ދަރިވަރުންނަށް ބުރަ ނުވާނެ ގޮތަކަށް އިތުރު ހަރަކާތްތައް ހިންގަން މިނިސްޓަރު އެދިވަޑައިގެންފި

ސްކޫލްތަކުގައި ހިންގާ އިތުރު ހަރަކާތްތައް ދަރިވަރުންގެ ކިޔެވުމަށް ބުރޫނާރާނެ ގޮތަކަށް އިންތިތާމް ކުރުމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ގޮވާލައްވައިފިއެވެ.

ސްކޫލްތަކުުގެ އެކްޓިވިޓީ ކަަލަންޑަރު އެކުލަވާލުމަށް ކުރިން މަޝްވަރާ ކުރުމަށް ބޭއްވި ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ބައެއް ސްކޫލްތަކާއި ކައުންސިލުން ސްކޫލް ހަރަކާތްތައް އިންތިޒާމް ކުރަމުން އަންނަ ގޮތުން އޭގެ ނޭދެވޭ އަސަރު ކުރަމުންދާ ކަމަށެވެ.

"ކުޅިވަރު އެބަ ބާއްވާ ރަށު ކައުންސިލުންވެސް، އެ ކުޅިވަރު އެބަ ބާއްވާ ސިޓީ ކައުންސިލުންވެސް، އަތޮޅު ކައުންސިލުންވެސް، އެ ކުޅިވަރު އޭ އެބަ ބާއްވާ އެ ކުޅިވަރު ކުރިއެރުވުމަށްޓަކައި ރާއްޖޭގެ އުފެދިފައި ހުންނަ އެސސޯސިއޭޝަންތަކުންވެސް، އަދި އަދަބީ ކަމަކަށް ބަލާއިރުގައިވެސް، އަދަބީ ކަންތައްތައް ރަށު ކައުންސިލުންވެސް ބާއްވާފައި އަތޮޅު ކައުންސިލުންވެސް ބާއްވާފައި، އަދި އެކަމާއި ގުޅޭ ދައުލަތުގެ މުވައްސަސާގެ ފަރާތުން އެކަން ކުރަންވީމަ އެއީ ހަމަ ދަތި އުނދަގޫ ކަމެއް،". މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، ދަރިވަރުންނާއި، ޓީޗަރުން އަދި ބެލެނެވެރިންނަށް މިފަދަ ހަރަކާތްތަކަކީ ވޭނަކަށް ނޯންނަ މިންވަރަށް ވާން ޖެހޭނެ ކަމަށެވެ. އަދި މިކަންކަން ރާވާއިރު، ތައުލީމީ ދާއިރާއިން ކުރާ މުޅި މަަސައްކަތަކަށް ބުރާ އަރައިގެން ނުވާނެ ކަންވެސް ފާހަގަކުރައްވާފައެވެ.

މި މަޝްވަރާ ކުރިއަށް ގެންދަވަނީ ދެ ދުވަހުގެ މުއްދަތަކަށެވެ. މިއީ އެ ވުޒާރާއިން ބާއްވާ ފުރަތަމަ ބައްދަލުވުމަށް ވާއިރު، މި ބައްދަލުވުން ކުރިއަށް ގެންދަނީ 92 ބައިވެރިންނާއި އެކުގައެވެ.