އެމްއެފްޑީއޭއިން މަނާކުރި ދެ ބޭހަށް އަލުން ހުއްދަ ދީފި

ވަގުތީ ގޮތުން ކުރިން މަނާކޮށްފައިވާ ދެ ބޭހެއް އަލުން އިމްޕޯޓްކުރުމާއި ވިއްކުމާއި ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ދީފިއެވެ.

މި ދެ ބޭހަކީ ޕާކިސްތާނުގެ ކުންފުންޏަކުން އުފައްދާ މެފްނެކްްނެކް ސަސްޕެންޝަން (މެފެނެމިކް އެސިޑް) 5އެމްއެލް އަދި 50އެމްއެލް އާއި މެލޭޝިއާގެ ކުންފުންޏަކުން އުފައްދާ އެކްސެލް މެފެނެމިކް އެސިޑް ސަސްޕެންޝަން (މެފެނެމިކް އެސިޑް) 5އެމްއެލް އަދި 125އެމްޖީއެވެ.

އެމްއެފްޑީއޭއިން ބުނީ މި ދެ ބޭހުގެ މާކެޓުގައި ލިބެންހުރި ބެޗްތަކުގެ ސާމްޕަލް ނަގައި އިތުރަށް ޓެސްޓުކޮށް، ބޭހުގެ ރައްކާތެރިކަން ކަށަވަރުކުރުމަށްފަހު ވިއްކުމުގެ ހުއްދަ އަލުން މިވަނީ ދީފައެވެ.

ނަމަވެސް، ރައްކާތެރިކަމުގެ އިތުރު ފިޔަވަޅެއްގެ ގޮތުން، މި ދެ ބޭސް އިމްޕޯޓްކުރާއިރު ޑައިއީތައިލިން ގްލައިކޯލް (ޑީއީޖީ) އަދި އިތައިލީން ގްލައިކޯލް (އީޖީ) އެނަލައިސިސް ރިޕޯޓް ހުށަހަޅަންޖެހޭނެ ކަމަށް އެމްއެފްޑީއޭއިން ބުނެފައިވެ އެވެ. މި ރިޕޯޓަކީ ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން ހުއްދހުއްދަ ދީފައިވާ ލެބޯޓަރީއަކުން ހަދާފައިވާ ޓެސްޓަކަށް ވާންޖެހޭނެ ކަމަށްވެސް އެމްއެފްޑީއޭއިން ބުންޏެވެ.

މި ބޭސްތައް ވަގުތީގޮތުން މަނާކުރުމަށް އެމްއެފްޑީއޭއިން ނިންމީ، ބޭރު ގައުމުތަކުގައި މި ބޭސްތަކުގެ ރައްކާތެރިކަމާމެދު ސުވާލު އުފެދުމާ ގުޅިގެންނެވެ. ބައެއް ގައުމުތަކުގައި މި ބޭސްތަކުގެ ބައެއް ބެޗްތަކުގައި ނުރައްކާތެރި ކެމިކަލްތައް ހުރިކަމަށް ފާހަގަކުރެވުނެވެ. އެހެންކަމުން، ރާއްޖޭގައި ބޭނުންކުރާ ބޭސްތަކުގެ ރައްކާތެރިކަން ކަށަވަރުކުރުމަށްޓަކައި އެމްއެފްޑީއޭއިން މި ފިޔަވަޅު އެޅީއެވެ. މިފަދަ ފިޔަވަޅުތައް އެޅުމަކީ ރައްޔިތުންގެ ސިއްޙަތާއި ރައްކާތެރިކަން ކަށަވަރުކުރުމަށް އަޅާ މުހިންމު ފިޔަވަޅުތަކެކެވެ.