ޤުރުއާން މުބާރާތުގައި ސްކޫލްތަކުން ހޯދި ކާމިޔާބީ ފާހަގަކުރުމަށް ހާއްސަ ރަސްމިއްޔާތެއް

ތިލަދެކުނު ޤުރުއާން މުބާރާތުގައި ކުޅުދުއްފުށީ ސްކޫލްތަކުން ހޯދި ޝަރަފުވެރި ކާމިޔާބީ ފާހަގަކުރުމަށް ސިޓީ ކައުންސިލުން ހާއްސަ ރަސްމިއްޔާތެއް ބާއްވައިފި އެވެ.

އަތޮޅު ކައުންސިލުން ބޭއްވި ތިލަދެކުނު ޤުރުއާން ކިޔެވުމުގެ މުބާރާތުގައި ގަދަ ތިންވަނަ ހޯދީ ކުޅުދުއްފުށީގެ ސްކޫލްތަކުންނެވެ. އެގޮތުން އެއްވަނަ ޖަލާލުއްދީން ސްކޫލް ހޯދިއިރު ދެވަނަ ހޯދީ ހދ އަތޮޅު ތައުލީމީ މަރުކަޒެވެ. އަދި ތިންވަނަ ކާމިޔާބުކުރީ އަފީފުއްދީން ސްކޫލެވެ.

މި މުބާރާތުގައި ހދ. އަތޮޅުގެ 13 ރަށަކުން 15 ސްކޫލަކުން ވާދަކޮށް 168 ދަރިވަރުން ބައިވެރިވި އެވެ.

ކުޅުދުއްފުށީ ސްކޫލްތަކުން ހޯދި ކާމިޔާބީ ފާހަގަކޮށް ސިޓީ ކައުންސިލުން ޑިނަރ ނައިޓަކާއެކު ބޭއްވި މި ރަސްމިއްޔާތުގައި ތިން ސްކޫލަށް އަގު ވަޒަންކޮށް ފިލައެއް އެރުވި އެވެ. މި ފިލާ ހަވާލުކޮށްދެއްވީ މޭޔަރު މުހައްމަދު އާތިފެވެ. ސްކޫލްތަކުގެ ފަރާތުން ފިލައާ ހަވާލުވީ ދަރިވަރުންނެވެ.

މި ރަސްމިއްޔާތުގައި ވާހަކަދައްކަވަމުން މޭޔަރު އާތިފް ވިދާޅުވީ، މި އުފާވެރި މުނާސަބާގައި ދަރިވަރުން ހޯދައިދިން ކާމިޔާބީއަށްޓަކާ ރަށުގެ ކޮންމެ ރައްޔިތަކުންވެސް ފަހްރުވެރިވާނެ ކަމަށެވެ.

ޤުރުއާނުގެ ފަންނުގައި ކުޅުދުއްފުށީގައި މީހުން ބިނާކުރުމަކީ ސިޓީ ކައުންސިލުން ނުހަނު ބޮޑަށް ބޭނުންވާ ކަމެއް ކަމަށާއި އަދި އެ ބޭނުންވެސް ކުޅުދުއްފުއްޓަށް ވަރަށް ބޮޑަށް އޮތް ކަމެއްކަމަށެވެ.

"މި ފަދަ މުބާރާތްތަކުގައި ވާދަކޮށް ހަމައެކަނި ވަނަ ހޯދުމުގެ އިތުރުން މިއީ މުޖުތަމައު ސަހަރެއްގެ ގޮތުގައި ކުރިއަރާ ދިޔުމުގައި ބޭނުންވާ އިންސާނީ ވަސީލަތް ތަރައްގީވުން އެއީ އަޅުގަނޑުމެންގެ އެންމެ ބޮޑު އެއް ބޭނުން." އާތިފް ވިދާޅުވި އެވެ.

ކުރިއަށް އޮތްތަނުގައިވެސް މިފަދަ ކަންކަމުގައި ސިޓީ ކައުންސިލަރުން ވަރަށް ސްކޫލްތަކަށް އެހީވުމަށް ވަރަށް ބޮޑަށް މަސައްކަތްކޮށްދެއްވާނެ ކަމަށާއި އަދި އެހެން މުބާރާތްތަކަށްވެސް ކައުންސިލްގެ ގާބިލްކަން ހުރި ވަރަކުން އެހީތެރިވެދޭނެކަމުގައި ޔަގީންކަން މޭޔަރު ދެއްވި އެވެ.

ޤުރުއާނުގެ ފަންނު ކުރިއެރުވުމަށްޓަކާ ސިޓީ ކައުންސިލުން ވަނީ ޤުރުއާން ކޯޗުން ގެނެސް ތިން ސްކޫލްގެ ދަރިވަރުންނަށް ހާއްސަ ޕްރޮގުރާމެއް ކުރިއަށްގެންގޮސްދީފަ އެވެ.

މި ރަސްމިއްޔާތުގައި ޤުރުއާން މުބާރާތުގައި ބައިވެރިވި ދަރިވަރުންނާއި ބެލެނިވެރިންނާއި ސްކޫލްތަކުގެ މުވައްޒަފުންނާއި އަދި ޕްރިންސިޕަލުންނާއި ކައުންސިލަރުން ބައިވެރިވެވަޑައިގެންނެވި އެވެ.