ސިޓީ ހޮޓަލެއް ތަރައްގީކުރަން ހުޅުވާލަން މިނިސްޓްރީގެ ހުއްދައަށް އެދިއްޖެ

ކުޅުދުއްފުށީގައި ސިޓީ ހޮޓަލެއް އިމާރާތްކުރަން ބޭނުންވާ ބިން ކަނޑައަޅައި އެކަމުގެ ހުއްދައަށް ފިނޭންސް މިނިސްޓްރީގައި އެދުމަށް ސިޓީ ކައުންސިލުން ފާސްކޮށްފި އެވެ.

ލާމަރުކަޒީ ގާނޫނުގެ 16 މާއްދާއަށް ގެނައި ބަދަލާއެކު ކައުންސިލްތަކުގެ ފަހު ދައުރު ބިން ކުއްޔަށް ދިނުން ވަނީ ހުއްޓުވާފަ އެވެ.

މިދިޔަ ހަފްތާ ސިޓީ ކައުންސިލްގައި ބޭއްވި އާންމު ބައްދަލުވުމުގައި ނިންމީ 17300 އަކަފޫޓް ބިމެއް ސިޓީ ހޮޓަލެއް ތަރައްގީކުރުމަށް ހުޅުވާލުމަށެވެ.

ބޯޒިޔާރާތް ބީޗާއި ކޭޕީއެލް ދެމެދުގައި ސަރަހައްދުން ކަނޑައެޅި މި ބިން ސިޓީ ހޮޓަލެއް ތަރައްގީކުރަން ހުޅުވާލެވޭނީ ފިނޭންސް މިނިސްޓްރީން ހުއްދަ ލިބުމުންނެވެ.

މި ބައްދަލުވުމުގައި ވާހަކަދައްކަވަމުން މޭޔަރު މުހައްމަދު އާތިފް ވިދާޅުވީ، ރާއްޖޭގައި ލޯކަލް ޓުއަރިޒަމް ކުރިއަރާފައި ހުރި ރަށްތަކުގެ ކައުންސިލްތަކުން ކުރި މަސައްކަތަކަށްވުރެ ގިނަ މަސައްކަތް ޓުއަރިޒަމްގެ މަސައްކަތް ފަށަން ކުޅުދުއްފުށީ ސިޓީ ކައުންސިލުން ކޮށްފައިވާނެ ކަމަށެވެ.

އެގޮތުން މޭޔަރު ފާހަގަކުރެއްވި ބައެއް ކަންތައްތަކުގެ ތެރޭގައި ޓުއަރިޒަމް ދާއިރާގެ ގުޅުން ހުރި ވިޔަފާރީގެ ތަމްރީން ޕްރޮގުރާމު ހިންގުމާއި ރަށުގައި ޓޫރިސްޓުން އުޅޭނެ ގޮތުގެ އުސޫލުތައް ކަނޑައެޅުމާއި ޓުއަރިސްޓް ޑެސްކް ގާއިމުކުރުމާއި ހޮޓްލައިނެއް ގާއިމުކޮށްފައިވެ އެވެ.

އަދި ޓުއަރިޒަމް އެޑްވައިޒަރީ ބޯޑެއް އެކުލަވާލެވި ޓުއަރިޒަމްގެ ޕްލޭން ހެދުމުގެ މަސައްކަތްވެސް އަންނަނީ ސިޓީ ކައުންސިލުން ކުރަމުންނެވެ.

މި ކަންތައްތަކީ ޓުއަރިޒަމުގެ މަސައްކަތެއް ކުރަން ފަށަން ބޭނުންވާ ފަރާތްތަކަށް މުހިންމު ކަންތައްތަކެއްކަން ފާހަގަކޮށް މޭޔަރު ވިދާޅުވީ، އެ މަސައްކަތް ފަށަން ބޭނުންވާ ފަރާތްތަކަށް އެ ހުރިހާ އިންތިޒާމެއް ކުރެވޭނެ މަގު ކުޅުދުއްފުށީގައި ހަމަޖައްސާފައިވާނެ ކަމަށެވެ.

މި ބައްދަލުވުމުގައި ވޯޓާސް ސްޕޯޓްސްއާ ގުޅޭ ވިޔަފާރިކުރުމަށް މަސްމާރުކޭޓްގެ ދެކުނުން 1500 އަކަފޫޓްގެ ބިމެއްވެސް ދޫކުރަން ކަނޑައެޅި އެވެ. އެކަމަކު އެ މ ބިންވެސް ކުއްޔަށް ދޫކުރެވޭނީ ފިނޭންސް މިނިސްޓްރީގެ ހުއްދަލިބިގެންނެވެ.

ގާނޫނަށް ގެނައި ބަދަލާއެކު ފިނޭންސް މިނިސްޓްރީގެ ހުއްދައަށް ގިނަ ކަންތައްތަކެއް ކުރަން އެދިފައިވީނަމަވެސް ހުއްދަ ނުލިބޭ މައްސަލަ ބޮޑެވެ. ހުއްދަ ދެނީ ހަމައެކަނި ސަރުކާރުގެ ބައެއް ކުންފުނިތަކުގެ ވިޔަފާރި ބިންތަކަށް އެކަންޏެވެ.

މީގެ އިތުރުން ކުޅުދުއްފުއްޓަކީ ސާފުތާރިހު ރީތި ޓުއަރިސްޓުންނަށް އުޅެވޭ އަދި އެޓްރެކްޝަންތައް ކުރިއޭޓްވެފައިވާ ހުރި ރަށަކަށް ހެދުމަށްވެސް ސިޓީ ކައުންސިލުން ގިނަ މަސައްކަތެއްކޮށްފައިވާކަން މޭޔަރުގެ ވާހަކައިގައި ފާހަގަކުރެއްވި އެވެ.

ރަށްރަށުގެ ރައްޔިތުންގެ ބާރުތައް މައި ސަރުކާރަށް ނަގައި ކައުންސިލްތަކުގެ ބާރުތައް ވަނީ ވަރަށް ބޮޑަށް ހަނިކޮށްފަ އެވެ. މިކަމުގެ ސަބަބުން ރަށްރަށުގެ ތަރައްގީއަށް ކުރަމުން އަންނަ ގިނަ މަސައްކަތްތައް ވަނީ ހުއްޓުވާލާފަ އެވެ.