މަރުކަޒީ ސިޔާސަތާހެދި ކުޅުދުއްފުށީ ސްކޫލްތަކުގެ އާބާދީ ބޮޑުތަނުން މިއަހަރު މަދުވެއްޖެ

ސަރުކާރުން ގެންގުޅޭ މަރުކަޒީ ސިޔާސަތާހެދި ކުޅުދުއްފުށީ ސްކޫލްތަކުގެ އާބާދީ ވަރަށް ބޮޑުތަނުން މިއަހަރު މަދުވެއްޖެ އެވެ.

2025 ވަނަ އަހަރު ފިޔަވާ ފާއިތުވި ހުރިހާ އަހަރަކުވެސް ކުޅުދުއްފުށީ ސްކޫލުތަކުގެ އާބާދީ ދިޔައީ އަހަރުން އަހަރަށް އިތުރުވަމުންނެވެ. އެކަމަކު 2025 ވަނަ އަހަރު ސްކޫލުތަކުގެ އާބާދީ ފުރަތަމަ ފަހަރަށް މަދުވި އެވެ. އަދި މިއަހަރު ބޮޑުތަނުން ސްކޫލުތަކުގެ އާބާދީ ދިޔައީ ދަށަށެވެ.

ކުޅުދުއްފުށީ ސްކޫލްތަކުގެ ކިޔަވާ ދަރިވަރުންގެ އާބާދީ ކިޔަނީ ސަރުކާރު ތިން ސްކޫލާއި އަމިއްލަ ސްކޫލެއްކަމަށްވާ ސްމާޓް ވެލީ ސްކޫލްގައި ކިޔަވާ ދަރިވަރުންގެ އަދަދު ހިމަނައިގެންނެވެ.

މިއަހަރުގެ ދިރާސީ އާ އަހަރު ކިޔެވުން ފެށުނުއިރު ކުޅުދުއްފުށީ ސްކޫލްތަކުގެ ދަރިވަރުންގެ އާބާދީއަކީ 2850 އެވެ. މިދިޔަ ދިރާސީ އަހަރު އެ އަދަދު އުޅެނީ 2947 ގަ އެވެ.

2024 ވަނަ އަހަރުގެ ދިރާސީ އަހަރު ކުޅުދުއްފުށީ ސްކޫލުތަކުގައި 3009 ދަރިވަރުން ތައުލީމު ހާސިލުކުރިއިރު 2023 ވަނަ އަހަރު 3000 ދަރިވަރުން ތައުލީމު ހާސިލުކޮށްފައިވެ އެވެ. އަދި 2022 ވަނަ އަހަރު 2954 ދަރިވަރަކު ކުޅުދުއްފުށީ ސްކޫލްތަކުގައި ތައުލީމު ހާސިލުކުރިއިރު 2020 ވަނަ 2812 ދަރިވަރަކު ތައުލީމު ހާސިލުކުރި އެވެ.

މީގެ އިތުރުން 2019 ވަނަ އަހަރު ކުޅުދުއްފުށީ ސްކޫލްތަކުގައި 2736 ދަރިވަރަކު ކިޔެވި އެވެ.

ކުޅުދުއްފުށީގެ ސްކޫލްތަކުގެ އާބާދީ މިދިޔަ ދެ އަހަރު މަދުވީ މާލޭ ސަރަހައްދުގެ ސްކޫލުތަކަށް ކުޅުދުއްފުށީގެ އާއިލާތަކުން ބަދަލުވުމާ ގުޅިގެންނެވެ.