ކުޅުދުއްފުށީ ހޮސްޕިޓަލުގައި ޕްރައިވެޓް ރޫމް ފެސިލިޓީ އެޅުމުގެ ބަޔަކާ ހަވާލުކޮށްފި

ސިއްހީ ދާއިރާއިން ދޭ ހިދުމަތް އިތުރަށް ހަރުދަނާކޮށް ފުޅާކުރުމަށް ސަރުކާރުން ކުރާ މަސައްކަތުގެ ތެރެއިން ކުޅުދުއްފުށީ ރީޖަނަލް ހޮސްޕިޓަލްގައި ޕްރައިވެޓް ރޫމް، އައިސޮލޭޓް ކުރެވޭގޮތަށް ފެސިލިޓީއެއް އެޅުމަށް އަލްޓެކް މޯލްޑިވްސް ޕްރައިވެޓް ލިމިޓެޑްއާއި ހަވާލުކޮށްފި އެވެ.

53.56 މިލިއަންގެ މި މަޝްރޫއަކީ އޭޝިއަން އިންފްރާސްޓްޗާ އިންވެސްޓްމަންޓް ބޭންކް (އޭއައިއައިބީ) ފަންޑުކުރާ މަޝްރޫއެކެވެ. މިއީ މިބޭންކްއިން ރާއްޖޭގައި ކުރިއަށްގެންދާ ފުރަތަމަ ސްޓޭންޑް އެލޯން ޕްރޮޖެކްޓްއެވެ. މި މަސައްކަތް ނިންމުމަށް ހަމަޖެހިފައިވަނީ 435 ދުވަހުގެ ތެރޭގައެވެ.

މިކަމަށްޓަކާ މިނިސްޓްރީ އޮފް ހެލްތުގައި ބޭއްވި ރަސްމިއްޔާތުގައި މިނިސްޓްރީ އޮފް ހެލްތުގެ ފަރާތުން އެއްބަސްވުމުގައި ސޮއި ކުރެއްވީ މިނިސްޓަރ އޮފް ސްޓޭޓް ފޮރ ހެލްތު ހަދީޖާ ޢަބްދުއްޞަމަދު ޢަބްދުﷲ އަދި އަލްޓެކް މޯލްޑިވްސްގެ ފަރާތުން ސޮއި ކުރެއްވީ ޖެނެރަލް މެނޭޖަރ، ހުސައިން ތަސްމީން އެވެ.

ކުޅުދުއްފުށީ ރީޖަނަލް ހޮސްޕިޓަލްއަކީ މާލެ ސަރަހައްދު ފިޔަވައި، ރާއްޖޭގައި އެންމެ ގިނައިން ބަލި މީހުންނަށް ހިދުމަތްދޭ ހޮސްޕިޓަލެވެ. އެ ހޮސްޕިޓަލުން ހއ، ހދ، އަދި ށ އަތޮޅުގެ ރައްޔިތުންނަށް ހިދުމަތް ހޯދަ އެވެ. އަދި މި އަތޮޅުތަކުގެ ބޭރުންވެސް، އެހެނިހެން އަތޮޅުތަކުގެ ރައްޔިތުންވެސް ހިދުމަތް ހޯދުމަށް ކުޅުދުއްފުށި ހިޔާރުކުރެއެވެ.

ކުޅުދުއްފުށީ ހޮސްޕިޓަލްގައި އެކިދާއިރާއިން ސްޕެޝަލިސްޓް ހިދުމަތާއި، ސުޕަރ ސްޕެޝަލިސްޓްގެ ހިދުމަތްވެސް ލިބެންހުރެއެވެ. އަދި އެކި ވައްތަރުގެ ސާރޖަރީތައްވެސް ހެދެން ހުރެއެވެ.

މިވަގުތު މިހޮސްޕިޓަލަށް ހިދުމަތް ހޯދުމަށް އައިސް، އެޑްމިޓް ކުރަންޖެހިއްޖެ ހާލަތެއްގައި އެޑްމިޓްކުރަންޖެހެނީ ވޯރޑްގައެވެ. އެކި ރަށްރަށުން ދަތުރުކޮށްފައި އައިސް ވޯރޑްގައި އެޑްމިޓްކޮށްގެން ދިގު މުއްދަތަކަށް ހިދުމަތްދޭންޖެހޭ ހާލަތްތަކުގައި އެހީތެރިޔާއަށްވެސް އަދި ބަލިމީހާއަށްވެސް ދަތިތަކެއް ދިމާވެއެވެ. އެހީތެރިޔާއަށްވެސް އޮށޯވެލެވޭނެގޮތް ނުވެވުމާއި، ބައެއް ހާލަތްތަކުގައި ރަށުން ތަންތަން ކުއްޔަށް ހިފަން ޖެހުން ފަދަ ކަންކަން ދިމާވެއެވެ. ހާއްސަ ބޮޑެތި ސާރޖަރީތައް ހަދައިގެން މަޑުކުރަންޖެހޭ ހާލަތްތައްވެސް ދިމާވާކަމަށް މިނިސްޓްރީން ބުނެ އެވެ.

އަދި މީގެ އިތުރަށް، ހާއްސަކޮށް ޑޮވިޑް-19 ފަދަ ފަސޭހައިން ގައިން ގަޔަށް އަރާ ބަލިތަކުގެ ހާލަތްތަކުގައި، ވަކިން ބަލިމީހާ އައިސޮލޭޓް ކުރެވޭނެ ހިދުމަތްވެސް ހޮސްޕިޓަލުގައި ދެވެންނެތެވެ. އަދި މީގެ އިތުރަށް، ކުޅުދުއްފުށީ ހޮސްޕިޓަލަކީ މެޑިސިން ކިޔަވާ ކުދިންގެ ކޮމިއުނިޓީ މޮޑިއުލްސް އަދި މިނޫންވެސް ސިއްހީދާއިރާގެ އެތައް ތަމްރީންތަކެއް ގެންދާ މަރުކަޒެކެވެ. ނަމަވެސް، މިފަދަ ތަމްރީންތައް ގެންދިޔުމަށް ހޮސްޕިޓަލްގެ ކޮންފަރެންސް ރޫމް ނުވަތަ ސަރުކާރުގެ އެހެން މަރުކަޒެއްގެ ހޯލެއް ނުވަތަ ހޮސްޕިޓަލްގެ ބޭރުން ތަނެއް ކުއްޔަށްހިފައިގެން ކުރިއަށް ގެންދަން ޖެހޭ ކަމަށް މިނިސްޓްރީން ބުނެ އެވެ.

ކުޅުދުއްފުށި ހޮސްޕިޓަލްގެ ދަށުން އަތޮޅުތެރޭގެ މަރުކަޒުތަކުގެ މުވައްޒަފުންނާއެކު 700 އަށްވުރެ ގިނަ މުވައްޒަފުން ބަލަހައްޓާއިރު، މުވައްޒަފުން ތަމްރީންކުރާނެ ރަނގަޅު ވަސީލަތްތަކެއްވެސް މިވަގުތު ނުހުންކަމަށާއި އަދި ކޮމިއުނިޓީއާ ގުޅޭ މާސް ވޮރކްޝަޕްތައް ހިންގާނެ ޖާގަވެސް ނެތް ކަމަށެވެ.

މި ފެސިލިޓީގައި 14 ޕްރައިވެޓް ރޫމް ހުންނައިރު މި 14 ކޮޓަރި ހުންނާނީ ބަލިމިހާގެ އިތުރަށް ބަލިމީހާގެ އެހީތެރިއާއެކު ހުރެވޭގޮތަށެވެ. އަދި ކޮންމެ ކޮޓަރިއެއްގައި ފާހަނާ ހަރުކުރެވިފައި ހުންނާނެއެވެ. މިކޮޓަރިތަކުގެ ތެރޭގައި މޮޑަރޭޓް ޕޭޝަންޓް، ކްރިޓިކަލް ޕޭޝަންޓް އަދި ޕޭޝަންޓް ވިތް ސްޕެޝިއަލް ނީޑްއަށް ހާއްސަކުރެވިގައިވާ ކޮޓަރި ހުންނާނެ އެވެ. އަދި މިފެސިލިޓީގައި ޕްރައިވެޓް ރޫމްގެ އިތުރަށް މި އިމާރާތުގައި ޑައިލިސިސް ރޫމް، އެމަރޖެންސީ ރޫމް، މެޑިކަލް ސްޓޯރ، ޖެނެރަލް ސްޓޯރ، ނާރސް ސްޓޭޝަންސް، އޮޓޯކްލޭވް ރޫމްސް، އެޑްމިން ރޫމް، ބްރީފިންގ ރޫމް، ޔުޓިލިޓީ ރޫމްސް، ޓީރޫމް، ޑޮނިންގް، ޑޮފިންގ އަދި ވަކިން ނަމާދު ކުރެވޭ ގޮތަށް ނަމާދު ކޮޓަރިއެއްވެސް ހުންނާނެއެވެ. މީގެ އިތުރަށް މިއިމާރާތުގެ ފުރަތަމަ ފަންގިފިލާގައި، މަލްޓިޕާރޕޯސްހޯލެއްވެސް ހުންނާނެކަމަށް މިނިސްޓްރީ މައުލޫމާތުދެ އެވެ.

މިނިސްޓްރީން ބުނީ، ސަރުކާރުގެ އަމާޒަކީ ރައްޔިތުންނަށް ވީހާވެސްފަސޭހައިން ސިއްހީ ހިދުމަތް ލިބެންހުރުމާއި، އަދި މާލެއަށް ބަރޯސާވުން ކުޑަކޮށް އަތޮޅުތަކުގައި ގާއިމްކުރެވިފައިވާ ސިއްހީ ހިދުމަތްދޭ ތަންތަނުގެ ހިދުމަތް އިތުރަށް ފުޅާކޮށް ފެންވަރު ރަނގަޅުކުރުން ކަމަށެވެ.