އިޒްރޭލަކީ "ޓެރަރިސްޓު" ގައުމެއް: ރައީސް

ފަލަސްތީނުގެ ރައްޔިތުންނަށް ލާއިންސާނީ އެތައް އަނިޔާތަކެއް ދެމުން އަންނަ އިޒްރޭލަކީ "ޓެރަރިސްޓު" ގައުމެއްގެ ގޮތުގައި ރައީސުލްޖުމްހުރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު އެމަނިކުފާނަށް ކުރެއްވި ސުވާލަކަށް ޖަވާބު ދެއްވަމުންނެވެ.

މެދުއިރުމަތީގައި އިޒްރޭލާއި އެމެރިކާ ގުޅިގެން އީރާނަށް ދެމުން ގެންދާ ހަމަލާތަކާއި ގުޅިގެން ކުރެއްވި ސުވާލަށް ޖަވާބު ދެއްވަމުން ރައީސް ވަނީ ވަކި ގައުމެއް ހަމަލާ ދިނުން ކުށްވެރި ނުކުރައްވަވާ އީރާނުން ވެސް އެކިއެކި ގައުމުތަކަށް މި މައްސަލާގައި ހަމަލާ ދިނުން ވެސް ގޯސް ކުރައްވަވާފައެވެ.

"އީރާނުން ވެސް ހަމަލާދިނުން ކުށްވެރިކުރަން. އިސްރާއީލް ހަމަލާދިނުން ގޯސް. އިސްރާއީލަކީ ޓެރަރިސްޓް ގައުމެއް. ފަލަސްތީނު އެދަނީ ސުންނާފަތި ކުރަމުން. އެމެރިކާއިން ދޭ ހަމަލާ ވެސް ގޯސް. ހުރިހާ ފަރާތްތަކުން ވެސް ދެމުންދާ ހަމަލާތައް ގޯސް. އެއްވެސް ފަރާތަކުން އެ ކުރަނީ ރަނގަޅު ކަމެއް ނޫން." ރައީސް ވިދާޅުވިއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް މުއިއްޒު ވަނީ މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގައި ގެއްލުން ލިބެމުން އަންނަ އަރަބި އިސްލާމީ ގައުމުތަކުގެ ވެރިންނަށް ގުޅާ ރާއްޖޭން އޮތީ އެ ގައުމުތަކާއެކުކަން ހާމަ ކުރަމުން އަންނަ ކަމަށް ވިދާޅުވެފައެވެ.

އިސްރާއީލާއި އެމެރިކާ ގުޅިގެން އީރާނަށް ދެމުންދާ ވަރުގަދަ ހަމަލާތަކުގައި މަރުވި މީހުންގެ އަދަދު މިހާރު ވަނީ ވަރަށް ބޮޑަށް އިތުރުވެފައެވެ.

އީރާނުގެ ރެޑް ކްރެސެންޓާއި ބައިނަލްއަޤުވާމީ މީޑިއާތަކުން ރިޕޯޓްކުރާ ގޮތުގައި މިހާތަނަށް 201 މީހުން ވަނީ މަރުވެފައެވެ. މީގެ އިތުރުން 747 އަށްވުރެ ގިނަ މީހުން ޒަޚަމްވެފައިވާ ކަމަށް ބުނެއެވެ.