ރާއްޖެއަށް ދެ ކިލޯއެއްހާ މަސްތުވާތަކެތި އެތެރެކުރި ދެ އަންހެނަކު ހައްޔަރުކޮށްފި

ވައިގެ މަގުން ރާއްޖެއަށް ގާތްގަނޑަކަށް ދެ ކިލޯގެ މަސްތުވާތަކެތި އެތެރެކުރި ކަމުގެ ތުހުމަތުގައި ދެ އަންހެނަކު ހައްޔަރުކޮށް، އެމީހުންގެ ބަންދަށް 15 ދުވަސް ކްރިމިނަލް ކޯޓުން ޖަހައިފި އެވެ.

ފުލުހުން ބުނީ، މިދިޔަ ހުކުރު ދުވަހު ހިންގި މިއޮޕަރޭޝަނުގައި ހައްޔަރުކޮށްފައިވަނީ ކ. ތުލުސްދޫ، އާބިޖިލީހިޔާ، އާމިނަތު ރޫނާ (29އ) އާއި ގ. މުތީގެއާގެ، އަލްޔާ ޝަރްސާ ނަސީރު (25އ) އެވެ. މި ދެމީހުންގެ މައްޗަށް ކުރަނީ ރާއްޖެއަށް މަސްތުވާތަކެތި އެތެރެކޮށް، އޭގެ ވިޔަފާރިކުރާ ކަމުގެ ތުހުމަތެވެ.

މި މައްސަލައިގައި ހިމެނޭ ރޫނާ ހައްޔަރުކޮށްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ. އޭނާއަކީ ރާއްޖެ އައިއިރު އަމަލުތައް ހުރިގޮތުން ކަސްޓަމްސް އިން ހިފަހައްޓައި، ބަލައި ފާސްކުރުމަށްފަހު ފުލުހުންނާ ހަވާލުކުރި މީހެކެވެ. މި މައްސަލައިގައި ތުހުމަތުކުރެވޭ ދެވަނަ މީހާ ކަމަށްވާ އަލްޔާ ހައްޔަރުކޮށްފައިވަނީ ހުޅުމާލޭންނެވެ.

ފުލުހުން ބުނި ގޮތުގައި މި މީހުން އަތުން އަތުލައިގަތް މަސްތުވާތަކެތީގެ ވަގުތީ ބަރުދަނުގައި 1.8 ކިލޯ ހުރި ކަމަށް ކޯޓު އަމުރުން އެނގެ އެވެ. މިއީ ރާއްޖެއަށް އެތެރެކޮށް ވިޔަފާރިކުރުމަށް ގެނައި ތަކެތި ކަމަށް ފުލުހުން ތުހުމަތު ކުރެ އެވެ.

މި ދެމީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ތަހުގީގު ކުރިއަށް ގެންދިއުމަށްޓަކައި ދެ މީހުންވެސް 15 ދުވަހަށް ބަންދުގައި ބޭތިއްބުމަށް އެ ކޯޓުން ވަނީ އަމުރުކޮށްފަ އެވެ.

ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.