އެމެރިކާގެ ރައީސް ޑޮނަލްޑް ޓްރަމްޕް އިލްތިމާސްއާއި ގުޅިގެން، އީރާނާއި އިސްރާއީލުން ދެމުންދިޔަ ސީދާ ހަމަލާތައް ވަގުތީގޮތުން މެދުކަނޑާލާފައިވާކަމަށް އެ ދެ ގައުމުން ބުނެފިއެވެ. ނަމަވެސް އިސްރާއީލުން ލުބުނާނުގައި ހަރަކާތްތެރިވާ ހިޒްބުالله ޖަމާއަތަށް ހަމަލާދިނުން ކުރިއަށްގެންދާ ނަމަ، އަލުން ހަމަލާތައް ފަށާނެ ކަމުގެ އިންޒާރު އީރާނުން ވަނީ ދީފައެވެ.
މި ދެ ގައުމުގެ މެދުގައި ބަދަލުކުރެވުނު ހަމަލާތަކުގެ ސަބަބުން، ދެ ގައުމުގައި ހިނގަމުންދާ ހަނގުރާމަ ހުއްޓާލުމަށް ވޮޝިންގްޓަނުން ކުރަމުންދާ މަސައްކަތްތަކަށް ވަނީ ހުރަސްތަކެއް ކުރިމަތިވެފައެވެ.
މި ހަމަލާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު ފަހެއް އިންސައްތައަށް މަތިވެގެން ދިޔުމަށްފަހު، އީރާނުގެ ފުރަތަމަ ހަމަލާތަކުގެ މަރުހަލާ ނިމުނުކަން އެ ގައުމުގެ އަސްކަރިއްޔާއިން އިއުލާނުކުރުމާއެކު ތެލުގެ އަގުތައް ވަނީ އަލުން ދަށަށް ގޮސްފައެވެ.
އިސްރާއީލުގެ ނޫސްތަކުން ވެސް ވަނީ އީރާނަށް ދެމުންދިޔަ ހަމަލާތައް ހުއްޓާލުމަށް ނިންމާފައިވާކަން ކަށަވަރުކޮށްދީފައެވެ. މި ހަމަލާތައް ފެށުނީ އީރާނުން އިސްރާއީލުގެ ސަރަހައްދުތަކަށް މިސައިލް ހަމަލާތަކެއް ފޮނުވާލުމާ ގުޅިގެންނެވެ. އީރާނުން ބުނިގޮތުގައި އެއީ ބެއިރޫތުގެ ބޭރުގައި ހަރަކާތްތެރިވާ ހިޒްބުالله ޖަމާއަތަށް އިސްރާއީލުން ދިން ހަމަލާތަކުގެ ބަދަލުހިފުމެކެވެ.
އީރާނުގެ ހަމަލާތަކަށް ރައްދުދެމުން އިސްރާއީލުން ވަނީ އީރާނުގެ ވައިގެ ދިފާއީ ނިޒާމުތަކަށާއި ބެލިސްޓިކް މިސައިލް އުފެއްދުމަށް ބޭނުންކުރާ ޕެޓްރޯކެމިކަލް ކާރުޚާނާއަކަށް ހަމަލާދީފައެވެ. މިއަށް ރައްދުދިނުމުގެ ގޮތުން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ވަނީ އިސްރާއީލުގެ ހައިފާ ސިޓީގައި ހުރި އެފަދަ ކާރުޚާނާއަކަށް ހަމަލާދީފައެވެ. ނަމަވެސް މި ހަމަލާތަކުގައި އެއްވެސް މީހަކު މަރުވިކަމުގެ ރިޕޯޓެއް ދެ ގައުމުގެ އިދާރާތަކުން ވެސް ކޮށްފައެއް ނުވެއެވެ.
އެމެރިކާގެ ރައީސް ޑޮނަލްޑް ޓްރަމްޕް ސޯޝަލް މީޑިއާގައި ހާމަކުރި ގޮތުގައި އިސްރާއީލާއި އީރާނުން ވެސް ބޭނުންވަނީ ވަގުތުން ހަނގުރާމަ ހުއްޓާލުމަށެވެ. އަދި ސުލްހައިގެ ފަހުގެ މަޝްވަރާތައް ކުރިއަށްދާ ކަމަށް ވެސް ޓްރަމްޕް ބުންޏެވެ.
މީގެ އިތުރުން ޓްރަމްޕް ވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ފޯނުން ގުޅައި، އަލުން އީރާނާއެކު ހަނގުރާމައަކަށް ގޮސްފިނަމަ އެކަނި ހަނގުރާމަކުރަން ޖެހިދާނެ ކަމުގެ އިންޒާރު ދީފައެވެ.
