ފަސް މިލިއަން ގަސް ޕްރޮގްރާމަށް 10 ރަށެއްގައި ނާސަރީ އަޅަނީ

ސަރުކާރުން ކުރިއަށް ގެންދާ ފަސް މިލިއަން ގަސް އިންދުމުގެ ޕްރޮގްރާމަށް ބޭނުންވާ ގަސް އިންދުމަށް ނާސަރީ އަޅަން 10 ރަށަކަށް ގްރާންޓް ދީފިއެވެ.

އެންވަޔަރަންމެޓް މިނިސްޓްރީގައި ބޭއްވި ރަސްމިއްޔާތެއްގައި ނާސަރީ އެޅުމަށްޓަކައި ގްރާންޓް ދީފައިވާ ރަށްތަކުގެ ކައުންސިލްތަކާއިއެކު ވަނީ ސޮއިކޮށްފައެވެ.

5 އަހަރު ދުވަހުގެ ތެރޭގައި 5 މިލިއަން ގަސް އިންދުމަށް ރައީސުލްޖުމްހޫރިއްޔާ ވެވަޑައިގެންފައިވާ ވަޢުދުފުޅު ފުއްދެވުމުގެ ގޮތުން، ރާއްޖޭގެ އެކި ކަންކޮޅުތަކުގައި ނާސަރީތައް ބިނާކުރުމަށްޓަކައި 10 ރަށެއްގެ ކައުންސިލާއެކު މިއަދު ވަނީ ސޮއިކޮށްފައެވެ.

މި މަޝްރޫއުގެ ދަށުން ހިމެނޭ ފުރަތަމަ… pic.twitter.com/7b9d2k0Y2E

— Min. of Climate Change, Environment and Energy, MV (@MoEnvmv) June 23, 2026

މި މަޝްރޫއުގެ ފުރަތަމަ ބުރުގައި ހިމެނޭ 10 ރަށަކީ، ހއ. ކެލާ، ށ. މިލަންދޫ، ނ. ކެނދިކުޅުދޫ، ރ، އިންނަމާދޫ، ބ. މާޅޮސް، އއ. މަތިވެރި، މ. މުލައް، ތ. ކިނބިދޫ، ގއ. ދާންދޫގެ އިތުރުން ތިނަދޫ ސިޓީއެވެ.

މި އެއްބަސްވުމުގެ ދަށުން ނާސަރީ ތަރައްގީ ކުރުމަށް ކޮންމެ ރަށަކަށް 500,000 ރުފިޔާގެ އެހީއެއް ދިނުމަށް ވަނީ ހަމަޖެހިފައެވެ. އަދި ސޮއިކުރާ ތާރީހުން ފެށިގެން 7 މަސްދުވަހުގެ ތެރޭގައި ނާސަރީގެ މަސައްކަތްތައް ނިންމަންޖެހެއެވެ. މި ނާސަރީތަކަކީ އެ އަތޮޅުތަކުގައި 5 މިލިއަން ގަސް އިންދުމުގެ މަޝްރޫއު ކުރިއަށްގެންދިއުމުގައި މައިގަނޑު މަރުކަޒުތަކެއްގެ ގޮތުގައި ހަރަކާތްތެރިވާނެ ތަންތަނެވެ.

އެންވާރަމަންޓް މިނިސްޓްރީން ބުނީ، އަންދާޒާކުރެވޭ ގޮތުގައި ކޮންމެ ނާސަރީއަކުން އަހަރަކު ގާތްގަނޑަކަށް 50,000 ގަސް އުފައްދާނެ ކަމަށެވެ.

މީގެ ސަބަބުން ކައިރި ރަށްރަށަށް ބޭނުންވާ ގަސްތައް ފޯރުކޮށްދިނުމުގައި ބޮޑު ލުޔެއް ލިބިގެންދާނެއެވެ. އަދި މި މަޝްރޫއު އިތުރަށް ހަރުދަނާކުރުމަށްޓަކައި ނާސަރީތަކުގައި މަސައްކަތްކުރާ މުވައްޒަފުންނަށް ބޭނުންވާ ގާޑަނިންގ ތަމްރީނު ޕްރޮގްރާމްތައް ފަރުމާކުރުމުގެ މަސައްކަތްވެސް މިހާރު ދަނީ ކުރަމުން ކަމަށް އެ މިނިސްޓްރީން ބުނެއެވެ.