ހިރިމަރަދޫގައި ކައުންސިލެއް އިންތިހާބުކުރަން އެމްޑީޕީން ގޮވާލައިފި

ހދ. ހިރިމަރަދޫގައި އަލުން ކައުންސިލެއް އިންތިހާބުކުރަން އިދިކޮޅު އެމްޑީޕީން ސަރުކާރަށް ގޮވާލައިފި އެވެ.

އެމްޑީޕީން މިކަމަށް ގޮވާލީ ހިރިމަރަދޫ ފަޅުކުރުމުން އެ ރަށު ރައްޔިތުންގެ ކަންބޮޑުވުންތައް ދެނެގަނެ އެކަމުގެ ކަންބޮޑުވުން ހިއްސާކުރުމަށް ޕާޓީގެ ލާމަރުކަޒީ ކޮމެޓީން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އާ ބައްދަލުކުރުމަށްފަހު ބޭއްވި ނޫސްވެރިންގެ ބައްދަލުވުމުގަ އެވެ.

މި ބައްދަލުވުމުގައި އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒް ވިދާޅުވީ ހިރިމަރަދޫ ފަޅު ރަށެއްގެ ގޮތުގައި މި ސަރުކާރުން ކަނޑައެޅީ ސިޔާސީ ބޭނުމެއްގައި ކަމަށެވެ.

އެ ގޮތުން މިއީ ލޯކަލް ކައުންސިލް އިންތިހާބާ ދިމާކޮށް ހަނިމާދޫގެ މެޖޯރިޓީ ހޯދުމަށްޓަކައި ހިރިމަރަދޫގެ ރައްޔިތުންގެ ވޯޓު ހޯދަން ކުރި ކަމެއް ކަމަށް އަލީ ނިޔާޒް ވިދާޅުވި އެވެ.

ހިރިމަރަދޫގައި މިހާރުވެސް 300 އަށްވުރެ ގިނަ ރައްޔިތުން ދިރިއުޅޭކަން ފާހަގަކުރައްވާ ނިޔާޒް ވިދާޅުވީ އެ ރަށުގެ ބެލެނިވެރި ފަރާތަކީ ހަނިމާދޫ ކައުންސިލް ކަމަށް ރައީސް ޑރ. މުހައްމަދު މުއިއްޒުގެ ގަރާރުގައި ކަނޑައަޅުއްވާފައި ވީނަމަވެސް އެކަން އެ ގޮތަށް ނުހިނގާ ކަމަށެވެ.

ނިޔާޒް ވަނީ ރައީސްގެ ގަރާރު ބާތިލުކޮށް ހިރިމަރަދޫގައި ކައުންސިލެއް އުފައްދަވާ އެ ރަށުގައި ކައުންސިލް އިންތިހާބެއް ބޭއްވުމަށް ސަރުކާރަށް ގޮވާލައްވާފަ އެވެ.

ހިރިމަރަދޫގައި އަލުން ކައުންސިލެއް އުފެއްދުމަކީ އެންމެ ރަނގަޅު ހައްލު ކަމަށް ނިޔާޒް ވިދާޅުވި އެވެ. ހިރިމަރަދޫ ކައުންސިލް އުވާލެއްވީ ރައީސް މުއިއްޒުގެ ގަރާރަކުން މި އަހަރުގެ މޭ މަހު އެވެ.

އެ ގޮތުން ހިރިމަރަދޫގެ ރައްޔިތުން އެ އަތޮޅު ހަނިމާދޫއަށް ބަދަލުކުރުމަށް ނިންމައި، ހިރިމަރަދޫއަކީ މީހުން ދިރިނޫޅޭ ރަށެއްގެ ގޮތުގައި ރައީސް ކަނޑައެޅުއްވުމުން ހިރިމަރަދޫ ކައުންސިލާއި އެ ކައުންސިލްގެ އިދާރާ ވެސް ވަނީ އުވާލައްވާފަ އެވެ.