"މިއީ ދެން ފުޓްބޯޅައެއް ނޫން!" ނެވޭސްއަށް ފުރައްސާރަކުރި ސަޕޯޓަރުން އުމުރަށް ބޭރުކުރަން ރޮނާލްޑޯ ގޮވާލައިފި

ސައުދީ ޕްރޯ ލީގުގައި އަލް ތާއޫން އާއި އަލް ހިލާލް ބައްދަލުކުރި މެޗުގައި އަލް ތާއޫންގެ ސަޕޯޓަރުންގެ ފަރާތުން ފެނިގެންދިޔަ އިހުތިރާމް ކުޑަ އަމަލަކާ ގުޅިގެން މުޅި ފުޓްބޯޅަ ދުނިޔެ ވަނީ ސިހުމެއްގެ ތެރެއަށް ވެއްޓިފަ އެވެ. އަލް ހިލާލްއަށް ކުޅެމުންދާ ޕޯޗުގަލްގެ މިޑްފީލްޑަރު ރޫބެން ނެވޭސްގެ ނަފްސާނީ ހަމަޖެހުން ނަގާލުމުގެ ބޭނުމުގައި، އަލް ތާއޫންގެ ބައެއް ސަޕޯޓަރުން ވަނީ ނިޔާވެފައިވާ ޕޯޗުގަލްގެ ފޯވާޑް ޑިއޯގޯ ޖޯޓާގެ ނަން ކިޔައި މެޗުގެ ތެރެއިން އޭނާއަށް ނިސްބަތްކޮށް އަޑުގަދަކޮށް ފުރައްސާރަކޮށްފަ އެވެ.

ޖޯޓާއަކީ ނެވޭސްއާ އެކު އިންގްލަންޑްގެ ވުލްވްސް އަދި ޕޯޗުގަލް ގައުމީ ޓީމުގައި ވަރަށް ގާތްކޮށް އުޅުނު އެންމެ ގާތް އެއް އެކުވެރިޔާ އެވެ. 2025 ވަނަ އަހަރުގެ ޖުލައި މަހު ސްޕެއިންގައި ހިނގި ނުރައްކާތެރި ކާރު އެކްސިޑެންޓެއްގައި ޖޯޓާއާއި އޭނާގެ ކުޑަކުޑަ ކޮއްކޮ ނިޔާވި ހާދިސާއަކީ މުޅި ފުޓްބޯޅަ ދުނިޔެއަށް ބޮޑު ސިހުމެއް ލިބުނު ކަމެކެވެ. ޖޯޓާގެ ޖަނާޒާގައި ސަންދޯކު އުފުލުމުގައިވެސް އިސްކޮށް ބައިވެރިވި ނެވޭސް ވަނީ އެކުވެރިޔާގެ ހަނދާނުގައި ހަށިގަނޑުގައި ޓެޓޫއެއް ޖެހުމުގެ އިތުރުން ގައުމީ ޓީމުގައި ޖޯޓާ ބޭނުންކުރި 21 ނަންބަރު ޖާޒީވެސް އޭނާގެ ހަނދާނުގައި ނަގާފަ އެވެ.

ނަމަވެސް، މެޗުގެ ތެރެއިން ސަޕޯޓަރުން "ޖޯޓާ! ޖޯޓާ!" ކިޔައި ގޮވަން ފެށުމުން ނެވޭސް ވަނީ ރުޅިވެރިކަމާއެކު މަލާމާތުގެ ގޮތަކަށް އަތްޖަހައި، އުޑާ ދިމާލަށް އިނގިލި ދިއްކޮށް، ސަޕޯޓަރުންނާ ދިމާލަށް އިޝާރާތްކޮށްފަ އެވެ. މެޗަށްފަހު ވާހަކަދައްކަމުން ނެވޭސް ބުނީ "އަހަރެން އެދެނީ އެމީހުން ކުރި އިހުތިރާމް ކުޑަ އަމަލަށްފަހު އިތުރަށް ދުއާކުރަން ނުދިއުން. ކޮންމެއަކަސް މާތްރަސްކަލާނގެއަށް އެމީހުން ކުރި ކަންތައް ފެންނާނެ" ކަމަށެވެ.

މި ހާދިސާއާ ގުޅިގެން އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ ވަނީ އިންތިހާއަށް ރުޅިގަދަވެ، ސައުދީ ޕްރޯ ލީގުން އެފަދަ ސަޕޯޓަރުންނާމެދު ވަގުތުން ވަރުގަދަ ފިޔަވަޅު އަޅަން ގޮވާލާފަ އެވެ. ރޮނާލްޑޯ އޭނާގެ ސޯޝަލް މީޑިއާގައި ލިޔެފައިވަނީ "މިއީ ދެން ފުޓްބޯޅައެއް ނޫން. ކޮންމެ ކަމަކަށްވެސް އިންތަކެއް ހުންނަންވާނެ. ލީގުން ވަގުތުން ފިޔަވަޅު އަޅައި މިފަދަ ދަށު ދަރަޖައިގެ އަމަލުތައް ހުއްޓުވަންޖެހޭ" ކަމަށެވެ. އަދި މިފަދަ އިންސާނިއްޔަތުކަމެއް ނެތް އަމަލުތައް ހިންގާ ސަޕޯޓަރުންނަކީ ދުވަހަކުވެސް ދަނޑަށް ވަނުމުގެ ފުރުސަތު ދީގެންވާނެ ބައެއް ނޫން ކަމަށާއި، އެމީހުން އުމުރަށް ދަނޑުތަކުން ބޭރުކުރަންޖެހޭ ކަމަށްވެސް ރޮނާލްޑޯ ވަނީ ބުނެފަ އެވެ.

މި މެޗު އަލް ހިލާލުން 6-0 އިން ފަސޭހަކަމާއެކު ކާމިޔާބުކުރި ނަމަވެސް، މެޗަށްފަހު މުޅި މީޑިއާގެ ސަމާލުކަން ހުއްޓުނީ ސަޕޯޓަރުންގެ މި ހުތުރު އަމަލަށާއި، ރޮނާލްޑޯއާއި ނެވޭސްގެ އިތުރުން މުޅި ފުޓްބޯޅަ އާއިލާއިން އެކަމާ ދެކޮޅަށް އުފުލި ވަރުގަދަ އަޑަށެވެ.