ކުޑަކުދިންނަށް ކުރާ އަނިޔާ ހުއްޓުވުމުގެ ގަރާރެއްގައި ސޮއިކޮށްފި

ކުޑަކުދިންނަށް ކުރާ އެކި ބާވަތުގެ އަނިޔާތައް ހުއްޓުވުމަށާއި، ކުޑަކުދިންގެ ހައްގުތައް ރައްކާތެރިކުރުމުގެ ނިޒާމު ހަރުދަނާކޮށް، އަނިޔާގެ މައްސަލަތަކަށް އަވަސް އިޖާބައެއް ދިނުމަށް ބައިނަލްއަގްވާމީ އަދި ގައުމީ ފެންވަރުގައި ކުރެވޭ މަސައްކަތްތައް ފުޅާކުރުމުގެ މަގުސަދުގައި އެކުލަވައިލާފައިވާ "ބޮގޯޓާ ކޯލް ޓު އެކްޝަން" ގަރާރުގައި ރާއްޖެ އިން ސޮއިކޮށްފި އެވެ.

ސަރުކާރުގެ ފަރާތުން އެގަރާރުގައި ސޮއިކުރެއްވީ ހެލްތު މިނިސްޓަރު ޤީލާ އަލީ އެވެ.

"ބޮގޯޓާ ކޯލް ޓު އެކްޝަން" އަކީ 2024 ގެ ނޮވެންބަރު މަހު ކޮލަމްބިއާގެ ބޮގޯޓާގައި ބޭއްވުނު، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަގްވާމީ މަހާސިންތާގައި ބައިވެރިވި ގައުމުތަކުން އިސްނަގައިގެން ފާސްކުރި މުހިންމު ގަރާރެކެވެ.

މި ގަރާރުގެ މައިގަނޑު އަމާޒަކީ ކުޑަކުދިންނަށް ކުރާ އަނިޔާތަކާ ދެކޮޅަށް ފިޔަވަޅު އެޅުމަށް ބައިނަލްއަގްވާމީ ފެންވަރުގައި ކުރެވޭ މަސައްކަތްތައް އިތުރަށް ހަރުދަނާ ކުރުމެވެ. އެގޮތުން އިލްމީ ހޯދުންތަކާއި ހެކިތަކުގެ މައްޗަށް ބިނާކޮށް ރައްކާތެރިކަމުގެ ފިޔަވަޅުތައް އެޅުމާއި، ގާނޫނީ އަދި ސިޔާސަތުތަކުގެ އޮނިގަނޑުތައް ހަރުދަނާކުރުމަށް މި ގަރާރުގައި ބާރު އަޅާފައިވެ އެވެ.

މީގެ އިތުރުން، ޑިޖިޓަލް މާހައުލުގައި ކުދިންގެ ރައްކާތެރިކަން ކަށަވަރުކުރުމާއި، އިދާރީ ގުޅުންތައް ބަދަހިކުރުމުގެ އިތުރުން، ކުޑަކުދިންގެ މަސްލަހަތާ ގުޅޭ ނިންމުންތަކުގައި އެކުދިންގެ ބައިވެރިވުން މާނަހުރި ގޮތެއްގައި ހިމެނުމަށް ވެސް ގަރާރުގައި އިސްކަން ދީފައިވެ އެވެ.

ގަރާރުގައި ސޮއިކުރުމުގެ ރަސްމިއްޔާތުގައި ގީލާ ވިދާޅުވީ ކުޑަކުދިންނަށް ކުރާ އަނިޔާ ހުއްޓުވުމުގައި ދެމެހެއްޓެނިވި ކުރިއެރުމެއް ހޯދޭނީ ދައުލަތުގެ މުއައްސަސާތަކާއި، އާއިލާތަކާއި، މަދަނީ ޖަމްއިއްޔާތަކާއި، ބައިނަލްއަގްވާމީ ޖަމާއަތްތައް އަދި ކުޑަކުދިން ވެސް ހިމެނޭހެން މުޅި މުޖުތަމައު އެކުގައި ގުޅިގެން ކުރާ މަސައްކަތުން ކަމަށެވެ.

މި ގަރާރުގެ ދަށުން ކުޑަކުދިންގެ ދިރިއުޅުމަށް ދެމެހެއްޓެނިވި ހެޔޮ ބަދަލުތަކެއް ގެނައުމަށްޓަކައި، ބައިނަލްއަގްވާމީ ފަރާތްތަކާ ގުޅިގެން އަމަލީ ގޮތުން މަސައްކަތް ކުރުމުގައި ރާއްޖެ އަބަދުވެސް ދެމިއޮންނާނެކަމުގެ ޔަގީންކަން ހެލްތު މިނިސްޓްރީން ދީފައިވެ އެވެ.