ކުޅުދުއްފުށީގެ ސްކޫލުތަކުން އެޑިޔުކޭޝަން މިނިސްޓަރަށް ޝަކުވާ ގޯނިތަކެއް

އެޑިއުކޭޝަން މިނިސްޓަރު އުތުރުގެ ރަށްރަށަށް ކުރެއްވި ދަތުރުފުޅުގައި ބުރާސްފަތި ދުވަހު ހދ ކުޅުދުއްފުއްޓަށް ވަޑައިގެން 2 ޕްރީސްކޫލުގެ ބިންގާ އެޅުއްވުމަށް ފަހު ކުޅުދުއްފުށީގެ ސްކޫލު ތަކުގެ އިސްވެރިންނާއި ޕީޓީއޭ އާއި ހިންގާބޯޑުތަކާއި ބަައްދަލު ކުރެއްވުމުން ސްކޫލުތަކުން އެމަނިކުފާނަށް މަރުހަބާ ދެއްނެވީ “ޝަކުވާގެ މާފަތިތަކަކުން”ނެވެ.

ތައުލީމާބެހޭ ވަޒީރު ކުޅުދުއްފުއްޓަށް ވަޑައިގެން އެންމެ ފުރަތަމަ ބައްދަލު ކުރެއްވީ ކުޅުދުއްފުށީ 2 ޕްރީ ސްކޫލުގެ އިސްވެރިންނާއި ހިންގާ ކޮމެޓީތަކާ އެވެ. އެގޮތުން އަމީރު އަމީން ސްކޫލާއި އިރުމަތި އަވަށު ޕްރީ ސްކޫލުގެ އިސްވެރިންނާއި އެސްކޫލުތަކުގެ ބޯޑާއީ ޕީޓީއޭއާއެކު ރަށު ކައުންސިލުގައި ބޭއްވި ބައްދަލު ކުރެއްވުމުގައި 2 ސްކޫލަށް ދިމާވެފައިހުރި މައްސަލަތަކާއި އެކަންކަމާ ގުޅޭ ޝަކުވާތަކުގެ ވާހަކަ ދެއްކެވި އެވެ. އަދި ޕްރީ ސްކޫލުތަކަށް މިވަގުތު ދިމާވެފައިވާ އެންމެ ބޮޑު އެއް މައްސަލަ ކަމަށްވާ ފައިސާގެ ދަތިތަކާބެހޭ ގޮތުން ކުރިއަށް ދިޔަ މި މަޝްވަރާގައި މިނިސްޓަރަށް މާ އެދެވޭ ޖަވާބެއް ދެއްވިފައި ނުވާކަން ފާހަގަ ކުރެވެއެވެ. އަދި އެކަމުގައި އެޑިޔުކޭޝަން މިނިސްޓްރީގެ މައްސަލައެއް ނެތްކަން ދެއްކެވުމަށާއި އެކަމުގައި ފިނޭންސް މިނިސްޓްރީގެ އިހުމާލު އޮތްކަން ދެއްކެވުމަށް މަސައްކަތްކުރެއްވިކަން ފާހަގަކުރެވެއެވެ.

އެ ބައްދަލުވުމަށްފަހު މިނިސްޓަރު ދެން ވަޑައިގަތީ އުތުރުގެ އެންމެ ބޮޑު އެއް ސްކޫލު ކަމުގައިވާ ޖަލާލުއްދީން ސްކޫލަށެވެ. އެ ސްކޫލުގެ އެންމެ ބޮޑު އެއްޝަކުވާ އަކަށް ވެފައިވަނީ މާލިމީ އެއްނެތި ސްކޫލުގެ އޮޑި ތަޢުލީމީ ގަދަ ކަނޑުގައި ދުއްވަން ޖެހިފައިވުމެވެ. އެ ސްކޫލުގައި ޕްރިންސިޕަލެއް މަސައްކަތް ނުކުރާތާ މިހާރު ގާތްގަނޑަކަށް 1 އަހަރު ވެފައިވާއިރު ބެލެނިވެރިންނާއި ޓީޗަރުންގެ ކަންބޮޑުންވުންތައް މިނިސްޓަރަށް ދެންނެވުމުން ފުރަތަމަ ދެއްވެވީ ފިނި ޖަވާބެކެވެ. އެހެންނަމަވެސް ސްކޫލުގެ ޓީޗަރުންގެ ފަރާތުން އިތުރަށް އެކަމާމެދު ވާހަކަދެއްކެވުމުން މިނިސްޓަރުގެ ފަރާތުން އެދެވޭކަހަލަ ޖަވާބެއް ވަނީ ލިބިފައި އެވެ. އަދި އޭގެއިތުރުން އެ ސްކޫލަށް ދިމާވެފައިވާ ދަތިތަކާބެހޭ ގޮތުން މަޝްވަރާކޮށް ހިޔާލު ބަދަލު ކޮށްފައިވެއެވެ.

ޖަލާލުއްދީން ސްކޫލަށްފަހު ދެން މިނިސްޓަރު އާސިފް އަހުމަދު ވަޑައިގަަތީ އަފީފުއްދީން ސްކޫލަށެވެ. އަފީފުއްދީން ސްކޫލުން ފެނުނީ މުޅިން ތަފާތު މަންޒަރެވެ. މިނިސްޓަރާއި ބައްދަލު ކުރެއްވުމަށް ކެތް މަދުވެފައިވާ އެސްކޫލުގެ ޓީޗަރުން މިނިސްޓަރާއި ބައްދަލު ކުރެއްވީ ޝަކުވާގެ ބެނާ ތަކަކާއެކު އެވެ. ބެނާ ތަކުގައި ޓީޗަރުންގެ މުސާރަ ކުޑަވުމުގެ ސަބަބުން މިދާއިރާ ދޫކޮށް ރަގަޅު ޓީޗަރުން ދާކަމަށާއި މާލޭ ސްކޫލުތަކާއި ރާއްޖެތެރޭގެ ސްކޫލުތަކުގެ މެދުގައި މިނިސްޓްރީން ތަފާތު ކުރެއްވުންތައް ގެންގުޅޭ ކަމަށް ލިޔެފައި ހުއްޓެވެ.

އެންމެ ފަހު ސްކޫލަކަށް މިނިސްޓަރު ވަޑައިގެންނެވީ 34 އަހަރު ވެފައިވާ ހދ އަތޮޅު ތަޢުލީމީ މަރުކަޒަށެވެ. ހދ އަތޮޅު ތަޢުލީމީ މަރުކަޒުން ވެސް މިނިސްޓަރަށް މަރުހަބާ ދެންނެވީ ޝަކުވާތަކަކުންނެވެ. އެގޮތުން އެ ސްކޫލުގެ ޕްރިންސިޕަލް ޒިޔާދު ރަޝާދު މިނިސްޓަރުގެ އަރިހުގައި ހުރި ގޮޑީގައި އިންނަވައިގެން ޖެހިލުން ކުޑަކަމާއެކު މިނިސްޓްރީގެ ބައެއް ސިޔާސަތު ތަކަށް ވަރަށް ބޮޑަށް ފާޑު ވިދާޅުވެ ވާހަކަ ދެއްކެވި އެވެ. އަދި ތައުލީމީ މަރުކަޒުގެ ހޯލުގެ މައްސަލާގައި މިނިސްޓްރީގެ އިސްބޭފުޅުން ގެންގުޅުއްވި ހަަރުދަނާ ކަމެއް ނެތް ދޯދިޔާ ސިޔާސަތު މައްޗަށް ވެސް ޒިޔާދު ވާހަކަ ދެއްކެވި އެވެ. ޕްރިންސިޕަލްގެ ޝަކުވާތަކަށްވެސް އެންމެ  އެދެވޭ ގޮތެއްގައި މިނިސްޓަރު ޖަވާބު ދެއްވާފައެއް ނުވެއެވެ. އެބައްދަލުވުމުގައި، ސްކޫލު ބޯޑުގެ ބައެއް މެމްބަރުން ވަނީ 3 މަހުގެ ތެރޭގައި ހޯލުގެ އަމަލީ މަސައްކަތް ނުފެށިއްޖެނަމަ އިހުތިޖާޖު ކުރުމަށް ނިކުންނާނެކަމުގެ “އިންޒާރު” ދީފައި އެވެ.

ސްކޫލުތަކާއެކު ބޭއްވި ބައްދަލުކުރެއްވުން ތަކުގައި ސްކޫލުތަކުންކުރި ޝަކުވާތައް މިނިސްޓަރު އަޑުއެއްސެވި އެވެ. އަދި މިނިސްޓްރީއަށް ކުރެވިދާނެ ބައެއް ކަންކަމުގެ ވާހަކަ ވިދާޅުވެފައި ވެއެވެ. އެހެންނަމަވެސް ގިނަ މައްސަލަތަކާ ގުޅިގެން މިނިސްޓަރުގެ ދެއްކެވި ވާހަކަފުޅުތަކުގައި، ސަރުކާރުގެ އެހެން މުއްސަސާތަކުގެ މައްސަލަތައް ފާހަގަކޮށްފައި ވެއެވެ.

މިނިސްޓަރުގެ މިދަތުރުފުޅުގައި މިނިސްޓަރުގެ އިތުރުން މިނިސްޓްރީގެ ނައިބު އަދި މިނިސްޓްރީގެ އެކި ޑިޕާޓްމެންޓްތަކުގެ ވެރިން ވަނީ ބައިވެރިވެފައެވެ.

[yass cats=25]