އުރީދޫ މަސްރޭހުގެ ހަތްވަނަ ސީޒަން ޓީމް ރަތްމަސް ކާމިޔާބު ކޮށްފި

އުރީދޫ މަސްރޭހުގެ ހަތްވަނަ ސީޒަން ޓީމް ރަތްމަސް ކާމިޔާބުކޮށްފި އެވެ.

މި ޓީމުން މަސްރޭސްގެ ޗެމްޕިއަންކަން ހޯދީ އިއްޔެ ކުރިއަށްދިޔަ މަސްރޭހުގެ ފައިނަލްގައި އެންޒީ، ލަޔަން ލޮޖިސްޓީކް އަދި ކުރުނބާ އާއބައްދަލުކުރުމަށްފަހު ކާމިޔާބު ހޯދައިގެންނެވެ.

މަސްރޭހުގެ ޗެމްޕިއަން ޓީމް ކަމަށްވާ ޓީމް ރަތްމަސް ވަނީ 647.90 ޕޮއިންޓްސް އާއއެކު މަސްރޭހުގެ ހަޔާތުގައި އެންމެ ގިނަ ޕޮއިންޓް ހޯދި ޓީމް އަށް ވެފައި އެވެ. ޗެމްޕިއަން ޓީމް އަށް ވަނީ 50،000 ރުފިޔާގެ ފައިސާގެ އިނާމުގެ އިތުރުން 80 ހޯރސްޕަވަރުގެ އައުޓްބޯރޑް އިންޖީނެއް ހަދިޔާ ކޮށްފައެވެ.

ހަމައެއާއެކު މުޅި މުބާރާތުގައި ރިކޯޑު އަދަދަކަށް މަސްބޭނި، ޓީމް ރަތްމަސްގެ އަލީ ސަމީހު އަށް ވަނީ 5000 ރުފިޔާގެ ފައިސާގެ އިނާމެއް އަދި 3 ހޯރސްޕަވަރުގެ އައުޓްބޯރޑް އިންޖީނެއް ދީފައެވެ.

މިއަހަރުގެ އުރީދޫ މަސްރޭހުގައި 5.7 ކިލޯ ގްރާމްގެ އެންމެ ބަރު މަސް ބާނައިފައިވާ ލަޔަން ލޮޖިސްޓިކްސްގެ ހަސަން މަނިކަށް ވަނީ 5000 ރުފިޔާގެ އިނާމުގެ އިތުރުން 3 ހޯރސްޕަވަރުގެ އައުޓްބޯރޑް އިންޖީނެއް ދީފައެވެ.

އުރީދޫ މަސްރޭހުގައި ހޮވާލެވޭ ވަނަތަކަށް ހުށައަޅާފައިވާ އިނާމުތަކުގެ ތެރެއިން ހުރިހާ އައުޓްބޯޑް އިންޖީނުތައް ހުށަހަޅާފައިވަނީ އެލިއާ އިންވެސްޓްމަންޓްސް އިންނެވެ.

“މިއަހަރުގެ މަސްރޭސް ވަނީ ބައިވެރިވި ފަރާތްތަކަށާއި ބެލުންތެރިންނަށްވެސް ވަރަށް ފޯރިގަދަ މުބާރާތަކަށްވެފައި. ފާއިތުވެތިޔަ ހަ އަހަރާއި އެއްފަދައިން މިއަހަރުވެސް ދިވެހިރާއްޖޭގައި ރަމަޟާން މަހުގެ ހާއްސަ ބަޔަކަށް ވެފައިވާ އުރީދޫ މަސްރޭސް ދިވެހި ރައްޔިތުންނަށް ގެނެސްދިނުމަކީ އަޅުގަނޑުމެންނަށް ވަރަށް ބޮޑު އުފަލެއް.” އުރީދޫގެ ސީއީއޯ ވިކްރަމް ސިންހަ ވިދާޅުވި އެވެ.