ގެވަޅު ދިނުން ލަސްވަމުން ދާތީ ނޮޅިވަރަމުގައި އިހްތިޖާޖު ކުރަމުން އެބަދޭ

ނޮޅިވަރަމުގައި ގެވަޅު ދިނުން ލަސްވަމުންދާތީ ރައްޔިތުން ހިތްހަމަނުޖެހުން ފާޅުކޮށް އިހުތިޖާޖު ކުރަމުން އެބަދެއެވެ.

އިހުތިޖާޖަށް ރައްޔިތުން ކައުންސިލް ދޮށަށް އެއްވެފައިވަނީ މިއަދު ހެނދުނު 10 ޖަހާއިރު އެވެ. ކޭއޯއަށް މައުލޫމާތު ދެމުން އެރަށު ރައްޔިތަކު ބުނީ މި އަހަރު ޖެނުއަރީގައި އިއުލާނު ކުރި 75 ގެވަޅަށް ގިނަ އަދަދެއްގެ ރައްޔިތުން ފޯމްލާފައިވާއިރު މިއަދާ ހަމައަށް ވެސް އެއްވެސް ޖަވާބެއް ކައުންސިލުން ދީފައިވާ ނުވާކަމަށާއި މިނިސްޓްރީގެ ތެރެއިން ކައުންސިލުން ވަނީ 75 ގެވަޅު ދޫކުރާނެ ސަރަހައްދުވެސް ފާސްކޮށްފަ ކަމަށެވެ.

މީގެ އިތުރުން ގެވަޅު ބޭނުންވެފައި ގިނަ އަދަދެއްގެ ރައްޔިތުން ތިބިކަން ފާހަގަކޮށް އޭނާ ބުނީ ރަށުގައި އިޖްތިމާއި އެތަށް މައްސަލަތަކެއް މިކަމުގެ ސަބަބުން ފެންމަތިވަމުން ދާކަމަށެވެ. މި ވަގުތު ގެވަޅު ދޫކުރުމަށް އިސްކޮށް އުޅުއްވި ކައުންސިލަރު ހުރީ ޗުއްޓީގައި ކަަމަށާއި ކައުންސިލުގެ ދެ ބޭފުޅަކު މިހާރު ރައްޔިތުންނާއި ވާހަކަ ދައްވަމުން ގެންދަވާ ކަމަށެވެ.

އަދި ގެވަޅު ދިނުން ލަސްވަނީ އަތޮޅު ކައުންސިލްގެ ފަރާތުން ނިމަން ޖެހޭކަމެއް ނުނިމިގެން ކަމަށް ދޭހަވާ ގޮތަކަށް ވާހަކަ ދައްކާފައިވާ ކަމަށްވެސް އެނާ ވިދާޅުވި އެވެ. އެގޮތުން ކޭއޯ ކުރި ސުވާލަކަށް ޖަވާބު ދެމުން އަތޮޅު ކައުންސިލުން ވަނީ އެއްވެސް ރަށެއްގައި ގެވަޅު ދިނުމުގެ ކަންކަމުގައި އެ ކައުންސިލުގެ އެއްވެސް ހިއްސާއެއް އަދި އެއްވެސް ހުއްދައެއް ނަގަން ނުޖެހޭނެކަމަށް ވިދާޅުވެފަ އެވެ.

ކައުންސިލް ކައިރީގައި 150 ވުރެ ގިނަ ރައްޔިތުން އިހުތިޖާޖް ކުރަމުންދާއިރު ޖަވާބެއް ލިބެންދެން ކައުންސިލް ބަންދު ނުކުރާނެ ކަމަށް ދަނީ ގޮވަމުންނެވެ. އެކި ކަހަލަ ބެނާތަކާއި އެކު މުޒާހަރާގައި ގިނައިން ހަރަކާތްތެރިވަމުން ދަނީ އަންހެނުން ކަންވެސް ފާހަގަކޮށްލެވެ އެވެ.

ނޮޅިވަރަމްގައި އެންމެ ފަހުން ގެވަޅު ދިނުމުގެ ހުއްދަ ކައުންސިލަށް ދީފައިވަނީ މިދިޔަ އަހަރުއެވެ. އެއީ 75 ގެވަޅަށެވެ. އެ ރަށުގައި ގެވަޅު ދޫނުކުރާތާ މިހާރު 9 އަހަރު ވަނީ ވެފައެވެ.