މިނިމަމް ވޭޖް ބިލާއެކު މުހިންމު ދެ ބިލެއް މަޖިލީހަށް ހުށަހަޅަނީ

ރާއްޖޭގައި އެންމެ ކުޑަމިނުން ދެވޭ މުސާރަ އާއި އުޖޫރަ ކަނޑައެޅުމުގެ ބިލް ކުރިއަށް އޮތް ދައުރުގެ ރައްޔިތުން މަޖިލީހަށް ހުށަހަޅައި ފާސްކުރާނެކަމަށް ރައީސުލް ޖުމްހޫރިއްޔާ އިބުރާހިމް މުހައްމަދު ސޯލިހް ވިދާޅުވެއްޖެ އެވެ.

މިނިމަމް ވޭޖް ކަނޑެއެޅުމަކީ ރައީސުލް ޖުމްހޫރިއްޔާ އިބުރާހިމް މުހައްމަދު ސޯލިހްގެ ރިޔާސީ ވައުދުފުޅެކެވެ. ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް މިއަދު ވިދާޅުވީ ކުރިއަށް އޮތް ދައުރަށް މުހިންމު ތިން ބިލެއް މަޖިލީހަށް ހުށަހަޅާނެ ކަމަށެވެ.

"އިންކަމް ޓެކްސްގެ ގާނޫނުގެ ޑްރާޕްޓް މިހާރު ވާނީ ނިމިފަ. ކަމާ ބެހޭ ފަރާތްތަކާއެކުގައި މަޝްވަރާކުރުމަށްފަހު ކުރިއަށް އޮތް ދައުރަށް ހުށަހެޅިގެންދާނެ. އަދި މިނިމަން ވޭޖް ބިލް މިއަހަރުތެރޭގައި މަޖިލީހަށް ހުށަހަޅާ ފާސްކުރާނަން." ނޫސްވެރިންނާ ވާހަކަދައްކަވަމުން ރައީސް ވިދާޅުވި އެވެ.

އެގޮތުން ރައީސް ވިދާޅުވީ، ލާމާރުކަޒީ ގާނޫނަށް ބޮޑެތި އިސްލާހްތަކާއެކު ކުރިއަށް އޮތް މަޖިލީހަށް ހުށަހަޅާނެ ކަމަށެވެ. އަދި އިންކަމް ޓެކްސްގެ ބިލްވެސް އަންނަ ދައުރު މަޖިލީހަށް ހުށަހަޅާނެކަމަށް ރައީސް ވިދާޅުވި އެވެ.