މިއީ ދެ މޫސުމް ބެދޭ ވިއްސާރަ، ކުރިއަށް އޮތް ދެ ދުވަހު މޫސުމް ގޯސްވާނެ

މާދަމާ މެންދުރު ފަހުން ފެށިގެން ކުރިއަށް އޮތް ދެ ދުވަހު އުތުރާއި މެދު ރާއްޖެ ތެރޭގެ ސަރަހައްދަށް ގަދަވަޔާއެކު ވިއްސާރަކޮށް، ކަނޑުތަށްވެސް އާދައިގެ ވަރަކަށް ގަދަވާނެކަމަށް މޫސުމާބެހޭ ގައުމީ އިދާރާއިން ބުނެފި އެވެ.

އެއިދާރާއިން ބުނީ މިއީ އާންމުގޮތެއްގައި ދެ މޫސުމް ބެދޭ ދުވަސްވަރު ކުރަމުން އަންނަ ވިއްސާރައެއް ކަމަށާއި އަރަބި ކަނޑުގައި އުފެދިފައިވާ ސައިކްލޯނެއްގެ ސަބަބުން ކުރިއަށް އޮތް 48 ގަޑިއިރު އުތުރާއި މެދު ރާއްޖެތެރެއަށް ވިއްސާރަކުރާނެކަމަށް ލަފާކުރެވޭ ކަމަށެވެ.

ނަމަވެސް މިހާރު މި ސައިކްލޯންގެ އަސަރު އަންނަނީ ކުޑަވަމުން ކަމަށާއި ޑިޕްރެޝަން ފޯމްއަކަށް ބަދަލުވެ ތޫފާނަކަށް ބަދަލުވުމުގެ ފުރުސަތު ކުޑަކަމަށެވެ.

Swell waves surge expected. pic.twitter.com/PzyMTssMyK

— Maldives Meteorology (@MetMaldives) October 28, 2019

މެޓް އޮފީހުން ވަނީ މިއަދު 13:00 ން 17:00 އަށް ވައިޓް އެލާޓް ނެރެފަ އެވެ. އަދި ދެކުނުގެ އަތޮޅުތަކަށް އިރާއި އިރުދެކުނުން ގަޑިއަކު 3 މޭލާއި 13 މޭލާ ދެމެދުގެ ބާރު މިނުގައި ވައި ޖެހޭނެ ކަމަށާއި އެހެން ހިސާބުތަކަށް އުތުރާއި އިރު އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރު މިނުގައި ވައި ޖެހުމާއެކު ވިލާގަނޑުގައި ގާތްގަނޑަކަށް 35 މޭލުގެ ބާރުމިނަށް ވައިގަދަވުން އެކަށީގެންވާ ކަމަށެވެ.

ދެކުނުގެ އަތޮޅުތަކުގެ ކަނޑުތައް އާދައިގެ ވަރަކަށް މަޑުވިނަމަވެސް އެހެން ހިސާބުތަކަށް ކަނޑުތައް އާދައިގެ ވަރަކަށް ގަދަ ވެފައި ވިލާގަނޑުގައި ގަދަ ވާނެ ކަމަށެވެ.