ކުޅުދުއްފުށީ ހޮސްޕިޓާ ޓާޝިއަރީ ފެންވަރަށް ބަދަލުކުރުމަށް 51 މިލިއަން ރުފިޔާ ހިމަނައިފި

ކުޅުދުއްފުށީ ރީޖަނަލް ހޮސްޕިޓާ ޓާޝިއަރީ ފެންވަރަށް ބަދަލުކުރުމަށް އަންނަ އަހަރުގެ ބަޖެޓްގައި 51 މިލިއަން ރުފިޔާ ހިމަނައިފި އެވެ.

އަންނަ އަހަރަށް ލަފާކުރާ ބަޖެޓްގައި ސިއްހީ ދާއިރާ ތަރައްގީކުރުމަށް ބޮޑު ހޭދައެއްކުރަން ވަނީ ހަމަޖެހިފަ އެވެ. އެގޮތުން ރާއްޖޭގެ ސިއްހީ ނިޒާމު ތަރައްގީކޮށް ހަރުދަނާކުރުމަށް އަންނަ އަހަރުގެ ބަޖެޓްގައި 4.1 ބިލިއަން ރުފިޔާ ހޭދަކުރަން ހިމަނާފައިވެ އެވެ.

ކުޅުދުއްފުށީ ހޮސްޕިޓަލުގައި އިތުރުން ގދ ތިނަދޫ ރީޖަނަލް ހޮސްޕިޓާވެސް ޓާޝިއަރީ ފެންވަރަށް ބަދަލުކުރުމަށް ބަޖެޓްކޮށްފައިވެ އެވެ. އެގޮތުން ތިނަދޫ ހޮސްޕިޓަލަށް 90 މިލިއަން ރުފިޔާ ހިމަނާފައިވެ އެވެ.

އަދި 184 މިލިއަން ރުފިޔާ ކަނޑައަޅާފައިވަނީ އެކި ރަށްރަށުގައި ސިއްޙީ ހިދުމަތްދޭ ތަންތަން އިތުރަށް ތަރައްގީކޮށް ހިދުމަތް ފުޅާ ކުރުމަށެވެ.

ރާއްޖޭގެ ފަސް ސަރަހައްދެއްގެ ރީޖަނަލް ހޮސްޕިޓަލުތައް ޓާޝިއަރީކުރުމަކީ ރައީސް އިބުރާހިމް މުހައްމަދު ސޯލިހްގެ ވައުދުފުޅެކެވެ.