ކުޅުދުއްފުށީ ސަރަހައްދީ ބަނދަރުގެ ނެރުގެ އުތުރުފަރާތު ފައިކަށްޓައް ބޯޓެއް އަރައިފި

މުހައްމަދު އިސްމާއިލް

ކުޅުދުއްފުއްޓަށް މުދާބޭލުމަށް އައި ބޯޓެއް ކުޅުދުއްފުށީ ސަރަހައްދީ ބަނދަރުގެ އުތުރުފަރާތު ފައިކަށްޓައް އަރައިފިއެވެ.

އަލްފާ މައިކް ސަރވިސްގެ އޭޖެންޓް ކަމުގެ ދަށުންް އިންޑިޔާގެ ޓްޓިކޮރިން ބަނދަރުން ފުރައިގެން  ކުޅުދުއްފުއްޓަށް އައި އެމްވީ މުތަ ޕައަނިޔަރ މިއަދު ހެނދުނު 11:45 ހާއިރު ކުޅުދުއްފުށީ ސަރަހައްދީ ބަނދަރަށް ވަންނަން އުޅުމުގެ ތެރޭގައި މިހާދިސާ ހިނގަން ދިމާވީ ހުންގާނު ރަނގަޅަށް ނުހިފިގެންކަމަށް މައުލޫމާތު ލިބެއެވެ.

މިބޯޓުގައި މައިގަނޑުގޮތެއްގައި ހުރީ ކުޅުދުއްފުށީގައި ރޯހައުސް އަޅާ ތަނަށް ގެނައި ކޮންޓްރަކްޝަން ސާމާނެވެ. އޭގެ ތެރޭގައި ޕިކަޕް، ކެރޭން، އެކްސްކަވޭޓަރ، ތަށި މުށި އަދި ކޮންމެވެސް ވަރަކަށް ސިމެންތި ވެސް ބަރުކޮށްފައިހުރި ކަމަށް މައުލޫމާތު ލިބެއެވެ.

ކުޅުދުއްފުށީ ޕޯޓް ލިމިޓެޑް އިން އެހާދިސާ ހިނގުމާގުޅިގެން ބޯޓު ފުންކުރުމުގެ މަސައްކަތްވަނީ ފަށާފައެވެ. މިހާރު އެބޯޓު ވަނީ ފުންކުރެވި ބަނދަރުކުރެވިފައެވެ.