ދޯންޏެއް ފަރަށް އަރައި ކުޅުދުއްފުށީ މީހަކު ގެއްލިގެން ހޯދަނީ

ތިން މީހުންނާއެކު ދަތުރު ކުރަމުން ދިޔަ ދޯންޏެއް ފަރަށް އަރައި ކުޅުދުއްފުށީ މީހެއް ގެއްލިގެން އެމީހާ ހޯދުމުގެ މަސައްކަތް ކުރަމުންދާކަމަށް އެމްއެންޑީއެފުން ހާމަކޮށްފި އެވެ.

ގެއްލިގެން ހޯދަމުން ދަނީ ކުޅުދުއްފުށީ ހަވީރީނާޒް، މުހައްމަދު ޔޫސުފް (37އ) ކަމަށް އެމްއެންޑީއެފް އިން މައުލޫމާތު ދެއެވެ.

ފަރަށް އަރާފައިވަނީ މުދާ އުފުލާ ދޯންޏެއް ކަމަށްވާ ޓީޓީއެސް ފާން ނަމަކަށް ކިޔާ ދޯޏްނެވެ. މުހައްމަދު ޔޫސުފަކީ އެ ދޯނީގައި ހުރި ހަމައެކަނި ދިވެހި މީހާ އެވެ.

ކ. ކަގި ކައިރިއަށް މި ދޯނި ފަރަށް އެރިކަމުގެ ރިޕޯޓް އެމްއެންޑީއެފަށް ލިބިފައިވަނީ މިއަދު ހެނދުނު 8:09 ގަ އެވެ.

އޭނާ ގެއްލިގެން ހޯދަމުންދާ ސަރަހައްދުން ވަނީ ބައެއް ތަކެތި ފެނިފައި އެވެ. ނަމަވެސް އެއީ މުހައްމަދުގެ އެއްޗެހިިކަމެއް ނޫން ޔަގީނެއްނުވެ އެވެ.

އެމްއެންޑީއެފްގެ މީޑިއާ އޮފިޝަލް މޭޖާ އިބްރާހީމް އާޒިމް ވިދާޅުވީ އެ ސަރަހައްދުގެ މޫދު އަޑިން ބޮކްސާ ވައްތަރުގެ ޝޯޓަކާއި މާސްކެއް، މިހާތަނަށް ފެނިފައިވާ ކަމަށެވެ.