އެމްޑީޕީ ވޯޓާސް ލިސްޓަށް ޝަކުވާ ހުށަހަޅުމުގެ ފުރުސަތު ހުޅުވާލައިފި

ލޯކަލް ކައުންސިލް އިންތިހާބުގެ ޕްރައިމަރީގައި އެމްޑީޕީގެ ވޯޓްސްލިސްޓަށް ޝަކުވާހުށަހެޅުމުގެ ފުރުސަތު މާދަމާއާއި ހަމައަށް ހުޅުވާލައިފިއެވެ.

އެމްޑީޕީން ބުނެފައިވަނީ މިމަހުގެ 31 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޕްރައިމަރީގައި ވޯޓްލުމަށް ދާއިރާތަކުގެ ވޯޓާސްލިސްޓް އާންމުކޮށްފައިވާނެކަމަށާއި މިލިސްޓަށް ޝަކުވާ ހުށަހެޅުމަށްޓަކައި މިދިޔަ އަންގާރަ ދުވަހުން ފެށިގެން ހުކުރުދުވަހުގެ 6 ޖެހުމާއި ހަމައަށް ވަނީ ލެވިފައިކަމަށެވެ.

ރާއްޖޭގެ ހުރިހާ ދާއިރާގެ އެމްޑީޕީ ވޯޓާސްލިސްޓް އާންމުކޮށްފައި ވީނަމަވެސް ސިޓީ ކައުންސިލްތަކުގެ ވޯޓާސްލިސްޓް އަދި އާންމުކޮށްފައިނުވެއެވެ. އެމްޑީޕީން ބުނީ ސިޓީ ކައުންސިލްތަކުގެ ދާއިރާތަކަށް އައިސްފައިވާ ބަދަލުތަކާއިއެކު ދާއިރާތަކުގެ ވޯޓާސްލިސްޓް ފައިނަލްކޮށް ކުޅުދުއްފުށީ ސިޓީ، އައްޑޫ ސިޓީ، ފުވައްމުލައް ސިޓީ އަދި މާލެ ސިޓީގެ ލޯކަލް ކައުންސިލް އިންތިހާބުގެ ދާއިރާތަކުގެ ވޯޓާރސް ލިސްޓަށް ޝަކުވާ ހުށަހެޅުމަށް ވަކިން ހުޅުވާލާނެކަމަށެވެ.

ކައުންސިލް އިންތިހާބު ބޭއްވުމަށް އިލެކްޝަންސް ކޮމިޝަނުން ކަނޑައަޅުއްވާފައިވާ ތާރީހަކީ އަންނަ އޭޕްރީލް މަހުގެ 4 ވަނަ ދުވަހެވެ. ޤާނޫނަށް ގެނައި ބަދަލާއެކު މިފަހަރުގެ ކައުންސިލް އިންތިހާބްގައި 980 ކައުންސިލަރުން އިންތިހާބްކުރާނެއެވެ.