ކައުންސިލް އިންތިހާބުގައި އެމްޑީޕީއަށް ސުޕަރމެޖޯރިޓީ ލިބޭނެ: އަލީ ނިޔާޒް

އޭޕްރީލްމަހު ބާއްވާ ލޯކަލް ކައުންސިލް އިންތިހާބުންވެސް އެމްޑީޕީއަށް ސުޕަރ މެޖޯރިޓީއެއް ލިބިގެންދާނެކަމަށް އެމްޑީޕީ ޗެއާރޕާޝަން ނައިބް އިދާރީ އަދި ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވެއްޖެއެވެ.

ނިޔާޒް މިހެން ވިދާޅުވީ، ކުޅުދުއްފުށި ސިޓީގެ ދާއިރާތައް ކަނޑައެޅުމަށް ރޭ ހދ އޭއީސީގައި ބޭއްވި ބައްދަލުވުމުގެ ހަވާސާގެ ތެރެއިން ކޭއޯއަށް ދެއްވި އިންޓަވިއުގައި ވާހަކަދައްކަވަމުންނެވެ.

އަލީ ނިޔާޒް ވިދާޅުވީ ލޯކަލް ކައުންސިލް އިންތިހާބުގެ ސްޕަރ މެޖޯރިޓީ ލިބިގެންދާނެކަމުގެ ފުރިހަމަ ޔަގީންކަން އެބައޮތްކަމަށާއި ޕާޓީގެ ޓިކެޓްގައި ވާދަކުރުމަށް ހުޅުވާލި ފުރުސަތުގައި އެކަމަށް ޝައުގުވެރިކަންފާޅުކުރި މިންވަރު އެކަން އެނގިފައިވާކަމަށެވެ.

"އޭގެ ހެއްކަކީ އަޅުގަނޑުމެންގެ ޓިކެޓްގައި ވާދަކުރުމަށް މިހުޅުވާލި ފުރުސަތުގައި ވެސް ލިބިގެން ދިޔަ ބޮޑު ތަރުހީބަށް ބަލާއިރުގައި އަޅުގަނޑު ދެކޭގޮތުގައި ޕާޓީގެ މެމްބަރުން މިއިންތިހާބަށް ޝައުގުވެރިވެފައި އޮތް މިންވަރު އެގިގެންގޮއްސި. ޑެޑްލައިނުން ހަމަވެގެން ދިޔައިރު ނުވަސަތޭކަ އައްޑިހަ މަގާމަށް ބާރަސަތޭކަވުރެން ގިނަ އެޕްލިކޭޝަން ފޯމް ލިބިފައިވޭ ." ނިޔާޒް ވިދާޅުވިއެވެ.

ނިޔާޒް ވިދާޅުވީ ޝައުގުވެރިކަން އެބައޮތްކަމަށާއި އަބަދުވެސް އެޝައުގުވެރިކަމުގައި ރަގަޅު ކެމްޕެއިނެއް ހިންގައިގެން ރައްޔިތުންނަށް ކޮށްދޭނެކަންކަމާއެކު ނިކުމެ ވަރަށް ބޮޑު ކާމިޔާބެއް ލިބިގެންދާނެކަމަށެވެ.