ކޮރޯނާ އާއި ހިމަބިއްސާ ގުޅިގެން ރާއްޖޭގެ ހުރިހާ ރަށެއްގެ މިސްކިތްތަކުގައި ޤުނޫތު ކިޔަން އަންގައިފި

މުޅި ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮރޯނާ ވައިރަސް އާއި ރާއްޖޭއިން ފެންނަމުންދާ ހިމަބިހި ފަދަ ނުރައްކާތެރި ބަލިތައް އާންމުވެފައިވާތީ ރާއްޖޭގެ ހުރިހާ ރަށެއްގައި މިސްކިތްތަކުގައި ޤުނޫތު ނާޒިލާ ކިޔަން އިސްލާމިކް މިނިސްޓްރީން އަންގައިފި އެވެ.

އިސްލާމިކް މިނިސްޓްރީން ބުނީ ކޮރޯނާ ވައިރަސްއާއި ހިމަބިހިފަދަ ނުރައްކާތެރި ބަލިތައް ފެތުރުން މިދުވަސްވަރު އާންމުވެފައިވާތީ މިފަދަ ނުރައްކާތެރި ބަލިތަކުން ރާއްޖެ ސަލާމަތްކޮށް ދެއްވުން އެދި ރާއްޖޭގެ ހުރިހާ މިސްކިތެއްގައިވެސް ޤުނޫތު ކިޔަން ހަމަޖެހިފައިވާ ކަމަށެވެ.

ކޮރޯނާ ވައިރަސްއާއި ހިމަބިހިފަދަ ނުރައްކާތެރި ބަލިތައް ފެތުރުން މިދުވަސްވަރު ޢާންމުވެފައިވާތީ، މިފަދަ ނުރައްކާތެރި ބަލިތަކުން ސަލާމަތްކޮށް ދެއްވުން އެދި 2020 ޖަނަވަރީ 30 ވާ ބުރާސްފަތި ދުވަހުގެ މަޣްރިބު ނަމާދުން ފެށިގެން، ޤުނޫތު ނާޒިލާ ކިޔާގޮތަށްވަނީ ހަމަޖެހިފައެވެ.#MVIaffairs

— Ministry of Islamic Affairs (@MVIaffairs) January 30, 2020

އެންމެ ގިނަ ދިވެހިން ދަތުރުކޮށް އުޅޭ އަވަށްޓެރި އިންޑިއާ އަދި ސްރީ ލަންކާ އިން ވެސް ކޮރޯނާވައިރަސް ޖެހިފައިވާ މީހަކު ފެނިފައިވާއިރު އެ ބަލީގައި މިހާތަނަށް 170 މީހުން މަރުވެފައިވެ އެވެ. ވައިރަސް ޖެހުނު މީހުންގެ އަދަދު ހަތް ހާހަށްވުރެން އިތުރެވެ. އަދި މިހާތަނަށް 17 ގައުމަކުން ކޮރޯނާވައިރަސް ފެނިފައިވެ އެވެ. ރާއްޖެއިން އެ ބައްޔަށް ޝައްކުވާ މީހަކު އަދި ނުފެންނަ ކަމަށް ކަމާއި ބެހޭ ފަރާތްތަކުން ބުނެ އެވެ.