ކުޅުދުއްފުށީގެ ގަސްރުއްކަށް ފެތުރިފައިވާ ހުދުކޫޑި ކޮންޓްރޯލުކުރަން މައުލޫމާތު ދެނީ

ކުޅުދުއްފުށީގެ ގިނަ ގަސްރުއްކަށް ދިމާވެފައިވާ ހުދުކޫޑި (ވައިޓް ފްލައި) މައްސަލަ ހައްލުކުރާނެ ގޮތުގެ މައުލޫމާތު ބައްދަލުވުމެއް ބާއްވަން ހަމަޖެހިއްޖެ އެވެ.

ހުދުކޫޑި މައްސަ ބޮޑުވެ ގިނަ ބައެއް ފަރާތްތަކުން އަންނަނީ ސޯޝަލް މީޑިއާގައިވެސް ކަންބޮޑުވުންފާޅުކުރަމުންނެވެ.

ކައުންސިލުން މިއަދު ބުނީ ހުދުކޫޑި މައްސަލަ ހައްލުކުރުމަށް މަސައްކަތްކުރަމުންދާ ކަމަށާއި އެގޮތުން ފިޝަރީޒް މިނިސްޓްރީގެ ތަޖުރިބާކާރަކު ގެނެސް ހުދުކޫޑި ކޮންޓްރޯލްކުރާނެ ގޮތުގެ މައުލޫމާތު ދޭން ހަމަޖެހިފައިވާ ކަމަށެވެ.

އާންމުންނަށް ހުޅުވާލައިގެން ބާއްވާ މިބައްދަލުވުމުގައި ކުރިއަށްދާނީ މިމަހު 8 ވަނަ ދުވަހު ރޭގަނޑު 08:30 ގައި ހދ އަތޮޅު ތައުލީމީ މަރުކަޒުގެ ހޯލުގައި ކަމަށެވެ.

މި ބައްދަލުވުމުގައި ހުދުކޫޑި ކޮންޓްރޯލްކުރުމަށް ބޭހާއި އެހެނިހެން ވަސީލަތްތައް ބޭނުންކުރާނެ ގޮތުގެ މައުލޫމާތު ދިނުމަށް ހަމަޖެހިފައިވާކަމަށް ކައުންސިލުން މައުލޫމާތުދެ އެވެ.



ކައުންސިލުން ބުނީ ހުދުކޫޑި ކޮންޓްރޯލްކުރާނެ ބޭހާއި އެހެނިހެން ވަސީލަތްތައް ކުޅުދުއްފުއްޓަށް ގެނައުމުގެ މަސައްކަތް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއާ ގުޅިގެން ކުރަމުންދާ ކަމަށެވެ.