އަންނަ ހަފްތާ އިގްތިސާދީ އެހީގެ ލޯނު ދޫކުރަން ފަށަނީ

ސްޓިމްލަސް ޕެކޭޖުން، އަންނަ ހަފްތާ ފައިސާ ދޫކުރަން ފަށާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ކޮރޯނާވައިރަހުގެ އިގްތިސާދީ ގެއްލުންތަކުން އަރައިގަތުމަށް ސަރުކާރުން ދޫކުރާ 2.5 ބިލިއަން ރުފިޔާގެ ސްޓިމްލަސް ޕެކޭޖުން 10 މިލިއަން ރުފިޔާއިން މަތީގެ އާމްދަނީ ލިބޭ ކުންފުނިތަކަށް ލޯނު ދޫކުރާނީ ބީއެމްއެލްއިނެވެ.

ނޭޝަނަލް އެމަޖެންސީ ރެސްޕޮންސް ސެންޓަރުގައި މިހާރު ކުރިއަށް ދާ ނޫސްވެރިންގެ ބައްދަލުވުމުގައި ފިނޭންސް މިނިސްޓަރު ވިދާޅުވީ ބިލިއަނެއްހާ ރުފިޔާ ބީއެމްއެލްއިން ފޯރުކޮށްދޭނެ ކަމަށާއި އަދި ބާކީ ދޭނީ އެމްއެމްއީ ބޭންކް، އެސްޑީއެފްސީއިން ކަމަށެވެ.

މިނިސްޓަރު މިރޭވެސް ވިދާޅުވީ ލޯނުތައް ދޫކުރަނީ ވަޒީފާއިން މީހުން ނުކަނޑާ ކުންފުނިތަކަށް ކަމަށެވެ.

އަދި، ސްޓިމްލަސް ޕެކޭޖްގެ އެންމެ ބޮޑު ބޭނުމަކީ ދިވެހިންގެ ވަޒީފާތައް ދެމެހެއްޓުން ކަމަށް ވެސް މިނިސްޓަރު ވިދާޅުވި އެވެ.