މޫނު ނިވާކޮށްގެން ތިބި ދެ މީހަކު ބިދޭސީއަކަށް ހަމަލާދީ ވޮލެޓް ފޭރިގެންފި

ކުޅުދުއްފުށީގައި ބިދޭސީއަކަށް ހަމަލާދީ އެ މީހާގެ ވޮލެޓް ބަޔަކު ފޭރިގެންފި އެވެ. ރޭ 10:30 ހާއިރު ހިންގި މި ހާދިސާގައި ހަމަލާދީފައިވަނީ ބަގްލަދޭޝްގެ ފިރިހެނަކަށެވެ.

ފުލުހުން ބުނީ ކާކުކަން ނޭނގޭ ގޮތަށް މޫނު ނިވާކޮށްގެން ތިބި ދެ މީހަކު ސައިކަލެއްގައި ގޮސް ބަންގްލަދޭޝް މީހާގެ ގައިގައި ދަނޑިބުރިއަކުން ޖަހާ މާރާމާރީ ހިންގުމަށްފަހު ވޮލެޓް ފޭރިގެންފައިވާކަމަށް ރިޕޯޓްކޮށްފައިވާ ކަމަށެވެ.

އޭނާއަށް ހަމަލާދީފައިވަނީ މަގުމަތިން ދަނިކޮށް ރޭގެ 10:30 ހާއިރުކަމަށް ފުލުހުން ބުނެފައިވެ އެވެ.

މި މާރާމާރީގެ ސަބަބުން ބިދޭސީ މީހާގެ ވާއަތު ބުމަ މަތިން އިންޗިއެއް ހުންނަވަރުގެ ތަނެއް ފަޅައިގެންގޮސްފައިވާއިރު ކަނާއަތު އަތަށްވެސް އަނިޔާ ލިބިފައިވެ އެވެ. ބިދޭސީ މީހާއަށް ވަނީ ހޮސްޕިޓަލަށް ގެންގޮސް ފަރުވާދީފަ އެވެ.

މިމައްސަލަ ފުލުހުން ދަނީ ތަހުގީގްކުރަމުންނެވެ.