ފަތިސް ނަމާދުން ފެށިގެން ކުޅުދުއްފުށީގެ މިސްކިތްތައް ހުޅުވާލަނީ، އީދު ނަމާދުވެސް އޮންނާނެ

މިރޭ ފަތިސް ނަމާދުން ފެށިގެން ކުޅުދުއްފުށި ސިޓީގެ މިސްކިތްތައް ހުޅުވާލަން ހަމަޖެހިފައިވާކަމަށް ކުޅުދުއްފުށީ ކައުންސިލުން ބުނެފި އެވެ. ކޮވިޑް-19 އާ ގުޅިގެން މިސްކިތްތަކުގެ ޖަމާއަތް އަލުން ފެށުމަށް ފުރަތަމަ ހިމެނި ރަށްތަކުގެ ތެރޭގައި ކުޅުދުއްފުށި ސިޓީ ހިމެނިފައިނުވެ އެވެ. ހެލްތް ޕްރޮޓެކްޝަން އެޖެންސީގެ ލަފާގެ މަތިން މިދިޔަ ހުކުރު ދުވަހުގެ ހުކުރު ނަމާދުން ފެށިގެން 25 ރަށެއް ފިޔަވައި އެހެން ރަށްތަކުގެ ޖަމާއަތް ހުޅުވާލަން އިސްލާމިކް މިނިސްޓްރީން ހުއްދަ ދިނެވެ.

ކުޅުދުއްފުށީ ކައުންސިލްގެ ރައީސް އަބުދުލް ލަތީފް ހަސަން ދެންމެ ކޭއޯއަށް ވިދާޅުވީ، މިރޭ ފަތިސް ނަމާދުން ފެށިގެން ކުޅުދުއްފުށީ މިސްކިތްތަކުގެ ޖަމާއަތް ހުޅުވާލުމަށް އިސްލާމިކް މިނިސްޓްރީ ހުއްދަ ދީފައިވާ ކަމަށެވެ.

"ދެންމެ އަޅުގަނޑުމެންނަށް މިނިސްޓްރީގެ ޝަރކިއުލަރ ލިބުނީ. މިހާރު މިއުޅެނީ އިމާމުންނަށް އެކަން އަންގާ އީދު ނަމާދުގެ ހުތުބާ ހަވާލުކުރުމުގެ މަސައްކަތުގައި." ލަތީފް ވިދާޅުވި އެވެ.

ލަތީފް ވިދާޅުވީ، އެހެންވުމުން މާދަމާ ކުޅުދުއްފުށީގެ މިސްކިތްތަކުގައި ފިތުރު އީދު ނަމާދުކުރުން އޮންނާނެ ކަމަށާއި އީދު ނަމާދުކުރާނީ ހުކުރު ކުރާ ފަސް މިސްކިތުގައި ކަމަށެވެ.

ރައްކާތެރިކަމުގެ ގޮތުން އަޅަން ޖެހޭ ފިޔަވަޅުތައް

އެގޮތުން މަސްޖިދުލް ޖަމާއަތުގައި އީދު ނަމާދުކުރައްވާނީ މުހައްމަދު އަލީ އެވެ. އަދި މަސްޖިދުލް ހަސަނާތުގައި ހުސެއިން އަހުމަދު، މަސްޖިދުލް ހަޟްރަތުގައި އަބޫބަކުރު ހަސަން، މަސްޖިދުލް ނޫރުގައި ހުސެއިން މުހައްމަދު، މަސްޖިދުލް ފިރުދައުސްގައި އީދު ނަމާދުކުރައްވާނީ ހަސަން ސޮބާހް އެވެ.