ފަތިސް ނަމާދުން ފެށިގެން ދިއްދޫގެ މިސްކިތްތައްވެސް ހުޅުވާލަނީ

މިރޭ ފަތިސް ނަމާދުން ފެށިގެން ހއ ދިއްދޫގެ މިސްކިތްތައްވެސް ހުޅުވާލުމުގެ ހުއްދަ އިސްލާމިކް މިނިސްޓްރީން ދީފި އެވެ.

ދިއްދޫ ކައުންސިލްގެ ރައީސް މުހައްމަދު ހާޝިމް ދެންމެ ކޭއޯއަށް ވިދާޅުވީ، އެރަށުގެ މިސްކިތްތައްވެސް ހުޅުވާލުމުގެ ހުއްދަ މިނިސްޓްރީން ދިނީ މިރޭ ދަންވަރު 12 ޖެހި ފަހުން ކަމަށެވެ.

އެހެންވުމުން ބޮޑު ޖަމާއަތުގައި ފިތުރު އީދު ނަމާދުކުރުމަށް އެކަށީގެންވާ ވަގުތު ނެތުމުން އެކަން މިއަހަރު އިންތިޒާމްނުކުރާ ގޮތަށް ހަމަޖެހިފައިވާ ކަމަށެވެ.

އޭނާ ވިދާޅުވީ، އެރަށުގެ ތިން މިސްކިތެއްގައި މާދަމާ އީދު ނަމާދު ކުރުން އޮންނާނެ ކަމަށެވެ. އެއީ މަސްޖިދުލް ނޫރުގައި ޖައުހަރީ އަލީ، މަސްޖިދުލް އުފްރާންގައި އަބުދުﷲ ޝަފީގް، އަދި މަސްޖިދުލް ރަހްމާގައި އީދު ނަމާދު ކުރައްވާނީ ނަސްރުﷲ ހަސަން ކަމަށެވެ.

ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތައް

ކޮވިޑް-19 އާ ގުޅިގެން މިސްކިތްތަކުގެ ޖަމާއަތް އަލުން ފެށުމަށް ފުރަތަމަ ހިމެނި ރަށްތަކުގެ ތެރޭގައި ދިއްދޫ ހިމެނިފައިނުވެ އެވެ. ހެލްތް ޕްރޮޓެކްޝަން އެޖެންސީގެ ލަފާގެ މަތިން މިދިޔަ ހުކުރު ދުވަހުގެ ހުކުރު ނަމާދުން ފެށިގެން 25 ރަށެއް ފިޔަވައި އެހެން ރަށްތަކުގެ ޖަމާއަތް ހުޅުވާލަން އިސްލާމިކް މިނިސްޓްރީން ހުއްދަ ދިނެވެ.