ހދ އަތޮޅު ކައުންސިލްގެ ރައީސްކަމަށް ވަސީމް

ހދ.އަތޮޅު ކައުންސިލްގެ ރައީސަކަށް ވައިކަރަދޫ ދާއިރާގެ މެންބަރު މުހައްމަދު ވަސީމު އިންތިހާބުކުރައްވައިފި އެވެ. އެކައުންސިލްގެ ރައީސްކަމުގެ މަގާމު ހުސްވީ މިދިޔަ އެޕްރީލްމަހު، އެމަގާމުގައި ހުންނެވި އާދަމް އަލީ އިސްތިއުފާ ދެއްވުމުންނެވެ. އާދަމް އަލީ އިސްތިއުފާ ދެއްވީ ކޮވިޑް-19 ކުރިމަތިވިއިރު އަތޮޅުގެ ރަށްތަކަށް ދިމާވި މައްސަލަތައް ހައްލުކުރުމަށް އެއްވެސް ވަރަކަށް މަސައްކަތްކޮށްފައި ނުވާތީ އެކަމަށް ފާޑުކިޔުން އަމާޒުވުމުންނެވެ.

ހދ.އަތޮޅު ކައުންސިލްގެ ހިންގާ ގަވާއިދުގައިވާ ގޮތުން، ރައީސާއި، ނާއިބު ރައީސްގެ ދައުރުގެ މުއްދަތަކީ 1 އަހަރެވެ. އެކަމަކު އެ މުއްދަތު ހަމަނުވަނީސް ރައީސް އިސްތިއުފާ ދެއްވުމުން އެ މަގާމު އޮތީ ހުސްކޮށެވެ. އެއް އަހަރުގެ ދައުރުހަމަވީ މި ޖޫންމަހުގެ ދެވަނަ ދުވަހު އެވެ. އެހެންވެ ރައީސްއަކުން އިންތިހާބުކުރެއްވިއިރު ނައިބު ރައީސަކަށްވެސް ވަނީ ބޭފުޅަކު އިންތިހާބުކުރައްވާފައި އެވެ.

ވީޑިއޯ ކޮންފަރެންސް މެދުވެރިކޮށް މިއަދު ބޭއްވުނު މި ބައްދަލުވުމުގައި އެކައުންސިލްގެ ނައިބު ރައީސަކަށް އިންތިހާބުކުރެއްވީ ކުރިންވެސް އެ މަގާމުގައި ހުންނެވި ހަނިމާދޫ ދާއިރާގެ މެމްބަރު އަލީ މުހައްމަދެވެ.

މިޖަލްސާގައި، ރައީސްގެ މަގާމަށް ކުރިމަތި ލެއްވުމަށް ހުޅުވާލުމުން، އެމަގާމަށް ކުރިމަތި ލައްވާފައިވަނީ ހަމައެކަނި މުހައްމަދު ވަސީމެވެ. ޖަލްސާގައި ބައިވެރިވެވަޑައިގެންނެވި 5 މެމްބަރުންގެ ތެރެއިން، ވަސީމު އިންތިހާބުކުރުމަށް ފެންނަ ކަމަށް 4 ވޯޓު އަދި ނުފެންނަ ކަމަށް 1 ވޯޓު ލިބިވަޑައިގެންނެވިކަމަށް އަތޮޅު ކައުންސިލުން ބުނެ އެވެ.

ނާއިބު ރައީސްކަމަށް ކުރިމަތިލެއްވީ އަލީ މުހައްމަދުގެ އިތުރުން މަކުނުދޫ ދާއިރާގެ މެންބަރު އިބްރާހީމް އަލީ އެވެ. ނާއިބު ރައީސަކަށް އަލީ އިންތިހާބު ވެފައިވަނީ ވޯޓުގައި ބައިވެރިވެވަޑައިގެންނެވި 5 މެންބަރުންގެ ތެރެއިން 4 ވޯޓުގެ އަގުލަބިއްޔަތުންނެވެ.