ބީއެމްއެލް ކާޑުގެ މައުލޫމާތު ލީކުވި މައްސަލަ ބަލަން އެސްއޯއީން ނިންމައިފި

ބޭންކް އޮފް މޯލްޑިވްސް (ބީއެމްއެލް)ގެ ކާޑުތަކެއްގެ މައުލޫމާތު ޑާކްވެބުގައި ލީކު ކުރި މައްސަލަ ބަލަން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް (އެސްއޯއީ) ކޮމިޓީން ފާސްކޮށްފި އެވެ.

ކާޑުތަކުގެ މައުލޫމާތު ލީކުވުމާ ގުޅިގެން ގިނަ ބައެއްގެ ފާޑުކިޔުން ބީއެމްއެލަށް ވަނީ އަމާޒުވެފަ އެވެ. ނަމަވެސް ކާޑުގެ މައުލޫމާތު ލީކުވީ ބީއެމްއެލްގެ ތެރެއިން ނޫން ކަމަށް ބޭންކުން ބުންޏެވެ. ބީއެމްއެލުން ބުނި ގޮތުގައި ކާޑުގެ މައުލޫމާތު ލީކުވެފައިވަނީ "އީ-ކޮމާސް މާޗެންޓެއް" ގެ ފަރާތުންނެވެ.

ބީއެމްއެލްގެ 350 ކާޑެއްގެ މައުލޫމާތު ޑާކްވެބުގައި ލީކުވެފައިވާ ކަމުގެ މައުލޫމާތު ލިބިފައިވާ ކަމަށް ބީއެމްއެލުން ވެސް ވަނީ ކަށަވަރުކޮށްދީފަ އެވެ. ބޭންކުން ބުނީ އެ މައުލޫމާތު ލިބުމާ އެކު ކާޑުތައް ބްލޮކްކޮށް، އާ ކާޑުތައް ހެދުމުގެ މަސައްކަތް މިހާރު ކުރަމުން އަންނަ ކަމަށެވެ.

މާޗެންޓުންގެ ފަރާތުން ކާޑުގެ މައުލޫމާތު ހާމަވާ ހާލަތްތަކުގައި ކަސްޓަމަރުންނަށް ފުރިހަމަ ރައްކާތެރިކަން ލިބޭނެ ކަމަށާއި މާލީ ގޮތުން އެއްވެސް ގެއްލުމެއް ނުލިބޭނެ ކަމުގެ ޔަގީންކަން ވެސް ބީއެމްއެލުން ވަނީ ދީފަ އެވެ.