މާލެ ސަރަހައްދުގައި މާދަމާ ހުކުރު ނަމާދު ކުރަން ފަށާނެ

ކޮވިޑް-19 އިން ރައްކާތެރިވުމަށް އެޅި ފިޔަވަޅުތަކުގެ ތެރެއިން މާލެ ސަރަހައްދުގެ މިސްކިތްތަކުގައި ހުކުރު ނަމާދުކުރުން ހުއްޓާލާފައި އޮތުމަށްފަހު މާދަމާ އިން ފެށިގެން ހުކުރު ނަމާދު ކުރަން އިސްލާމިކް މިނިސްޓްރީން ނިންމައިފި އެވެ.

އިސްލާމިކް މިނިސްޓްރީން ބުނީ މާދަމާ އިން ފެށިގެން މާލެ އާއި ވިލިމާލެ އަދި ހުޅުމާލޭގެ މިސްކިތްތަކުގައި ހުކުރު ނަމާދު ކުރާނެ ކަމަށެވެ.

މާލެ ސަރަހައްދުން ކޮވިޑް-19 އަށް ޕޮޒިޓިވް މީހަކު ފެނުމާއި ގުޅިގެން އެ ސަރަހައްދުގެ މިސްކިތްތަކުގައި ޖަމާއަތުގައި ނަމާދުކުރުން އޮތީ މެދުކަނޑާލައިފަ އެވެ. ނަމަވެސް މާލެ ސަރަހައްދުގެ ލޮކްޑައުންއަށް ލުއިތައް ދެމުން އައިސް މިދިޔަ ހަފްތާތެރޭގައި މިސްކިތްތަކުގައި ޖަމާއަތުގައި ނަމާދުކުރުމުގެ ހުއްދަ އިސްލާމިކް މިނިސްޓްރީން ވަނީ ދީފަ އެވެ. ނަމަވެސް ހުކުރު ނަމާދު ކުރުމަށް އޭރު ހުއްދައެއް ނުދެ އެވެ.

ރައްކާތެރިކަމުގެ ފިޔަވަޅެއްގެ ގޮތުން ޖަމާއަތުގައި ނަމާދަށް ދިއުމަށް މާސްކް އެޅުމާއި ގެއިން މުސައްލައެއް ގެންދިއުމާއި ވުލޫ ކޮށްގެން މިސްކިތަށް ދިއުމަށް މިނިސްޓްރީން ވަނީ އެދިފަ އެވެ.

ރާއްޖެއިން ކޮވިޑް-19 2517 މީހަކަށް މިހާތަނަށް ޖެހިފައިވާއިރު އޭގެ ތެރެއިން 2180 މީހަކު ވަނީ ރަނގަޅުވެފަ އެވެ. 13 މީހުން މިހާތަނަށް އެބަލިޖެހިގެން ރާއްޖެއިން މަރުވެއްޖެ އެވެ.