ޤާނޫނީ ކޮލަމް: ތިމާއާއެކު ވަޒީފާއަދާކުރާ ފަރާތެއް ޤާނޫނާ ޤަވައިދާ ޚިލާފު ޢަމަލެއް ހިންގަނީތޯއެވެ؟

ތިމާއާއެކު މަސައްކަތްކުރާ ފަރާތެއް ޤަވައިދާ ޚިލާފު ޢަމަލެއް ހިންގާކަމުގެ މަޢުލޫމާތު ވަޒީފާއަދާކުރާ ތަނުގެ އިސްވެރިންނަށް އެންގުމުން، ހުށަހެޅުނު މައްސަލައަށް އެދެވޭ ޙައްލެއް ނުލިބި ތިމާއަށް ލިބިދޭންޖެހޭ ޙައްޤުތަކުން މަޙްރޫމް ކޮށްލަނީތޯއެވެ؟ ސިވިލް ސަރވިސްގެ އެއްވެސް މުޢައްސަސާއެއްގައި ވަޒީފާއަދާ ކުރަމުންދާ ފަރާތަކުން މިފަދަ ޢަމަލެއް ހިންގާތަން ފެނި އެކަމުގެ ޝަކުވާ ވަޒީފާއަދާކުރާ ތަނުގެ އިސްވެރިންނަށް ހުށަހެޅުމުން އެ ޢަމަލު ހިންގާ ފަރާތާއިމެދު ތަފާތު ކުރާކަމުގައިވާނަމަ ސިވިލް ސަރވިސް ކޮމިޝަނަށް ހުށަހަޅާ ފަރާތުގެ ޙައްޤުތައް ރައްކާތެރިކުރެވޭނެ މަގު ވަނީ ޤާނޫނާ ޤަވައިދުގެ ތެރެއިން ފަހިކޮށްދީފައެވެ.

މައްސަލަ ހުށަހެޅުން

ސިވިލް ސަރވިސްގައި މަސައްކަތްކުރާ އެއްވެސް މުވައްޒަފަކު ޤާނޫނާ ޤަވައިދާ ޚިލާފުކަމެއް ކުރާކަމަށް ނުވަތަ ކުރަންއުޅޭކަމަށް ތުޙުމަތު ކުރެވިއްޖެނަމަ ފުރަތަމަ ކަމަކަށް އެ އޮފީހެއްގެ ޒިންމާދާރު އިސްވެރިޔާއަށް އެކަމެއް އެންގުމަކީ އެކަމެއްގެ މަޢުލޫމާތު ލިބޭ ކޮންމެ ފަރާތެއްގެ މައްޗަށްވެސް ލާޒިމްކަމެކެވެ. މިސާލަކަށް ސިވިލް ސަރވިސްގެ މަޤާމުތަކަށް މުވައްޒަފުން ނެގުމުގެ ޒިންމާއަދާކުރާ މުވައްޒަފަކު މަސައްކަތްކުރަނީ މަޤާމުގެ ނުފޫޒު ނަހަމަގޮތުގައި ބޭނުންކޮށްގެން އަމިއްލަ ބޭނުމެއް ހާޞިލުކުރުމަށް ކަމުގައި ބެލެވޭ ޙާލަތްތަކުގައި އެ ޢަމަލު ހިންގާކަން އެނގޭ ފަރާތުން އެކަން ރިޕޯޓް ކުރަންވާނެއެވެ. ނުވަތަ އޮފީހުގެ އިސްވެރިން މުވައްޒަފާމެދު ޢަމަލުކުރަނީ ޤާނޫނާ ޤަވައިދާއި ކޯޑް އޮފް ކޮންޑަކްޓާ ޚިލާފަށް ކަމުގައިވާނަމަވެސް އެ މަޢުލޫމާތު އެނގޭ މުވައްޒަފަކު އެކަން ރިޕޯޓްކުރަންވާނެއެވެ.

އެހެންނަމަވެސް، އެ މުވައްޒަފަކު އޮފީހުގެ ޒިންމާދާރު އިސްވެރިޔާއަށް ހުށަހެޅި މައްސަލައެއްގައި، އެ މުވައްޒަފަކު ހިތްހަމަޖެހޭ ނަތީޖާ ހާޞިލުނުވެއްޖެނަމަ ނުވަތަ މައްސަލަ ހުށަހެޅުމާގުޅިގެން، އެ މުވައްޒަފު ވަޒީފާ އަދާކުރަމުންދާ މުޢައްސަސާއިން އެ މުވައްޒަފަކާމެދު ފިޔަވަޅެއް އަޅައިފިނަމަ، މައްސަލަ ލިޔުމަކުން ސިވިލް ސަރވިސް ކޮމިޝަނަށް ހުށަހަޅަންވާނެއެވެ.

މައްސަލަ ހުށަހަޅާ ފަރާތަށް ލިބިގެންވާ ރައްކާތެރިކަން

ދިވެހި ސިވިލް ސަރވިސް ޤަވައިދާއި ސިވިލް ސަރވިސްގެ ކޯޑް އޮފް ކޮންޑަކްޓާ މުވައްޒަފަކު ޚިލާފުވެއްޖެކަމަށް ޤަބޫލުކުރެވިގެން، އެކަން އެ އޮފީހެއްގެ ޒިންމާދާރު އިސްވެރިޔާއަށް ނުވަތަ ސިވިލް ސަރވިސް ކޮމިޝަނަށް ރިޕޯޓްކުރި މުވައްޒަފަކާބެހޭ އެއްވެސް މަޢުލޫމާތެއް އެއްވެސް މުޢައްސަސާއަކުން ހާމަކޮށްގެން ނުވާނެއެވެ.

އަދި އެފަދަ ރިޕޯޓެއް ކުރިކަން ދެނެހުރި އެއްވެސް މީހަކު، އެ މުވައްޒަފަކާ މެދުގައި ނިކަމެތިކޮށް ހިތާ ނުވަތަ އެ މުވައްޒަފަކު ނިކަމެތި ކުރުމުގެގޮތުން ތަފާތުކުރުމެއް ގެންގުޅެގެން ނުވާނެއެވެ.

ސިވިލް ސަރވިސް ކޮމިޝަނުން މައްސަލަބެލުން

ކޮމިޝަނަށް މިފަދަ މައްސަލައެއް ހުށަހެޅުމުން އާންމު އުޞޫލަކީ، އެ މައްސަލައާއި ބެހޭ ސެކްޝަނުން އެ މައްސަލެއް ބެލުމެވެ. އެހެންނަމަވެސް، ހުށަހެޅެނީ އޮފީހުގެ ޒިންމާދާރު އިސްވެރިޔާއާއި ގުޅޭ ނުވަތަ އޮފީހުގެ އިސްވެރިންގެ މައްސަލައެއް ކަމުގައިވާނަމަ، މައްސަލަ ބެލިގެންދާނީ ކޮމިޝަނުގައި އެކުލަވާލާފައިވާ މައްސަލަބަލާ ކޮމިޓީއިންނެވެ. މިގޮތުން ހުށަހަޅާ މައްސަލައެއްގެ ތަޙުޤީޤު ފުރިހަމަކޮށް، އެމައްސަލަ ހުށަހެޅި ފަރާތާމެދު ޢަމަލުކޮށްފައިވާ އުޞޫލަކީ ނުރަނގަޅު އުޞޫލެއްކަމުގައިވާނަމަ، އެ މުޢައްސަސާއިން ނިންމި ނިންމުން ބަދަލުކޮށް، އެ މުވައްޒަފުގެ ޙައްޤުތައް ކަށަވަރުކޮށްދިނުމަށް ކޮމިޝަނުން އެ މުޢައްސަސާއަކަށް އަންގާނެއެވެ.

ހަމައެހެންމެ މައްސަލައިގެ ތަޙުޤީޤުގެ ތެރެއިން، ޤާނޫނާ ޤަވައިދާ ޚިލާފަށް ޢަމަލުކޮށްފައިވާ މުވައްޒަފުގެ އިތުރުން އެހެނިހެން މުވައްޒަފުން އެ މައްސަލައިގާ ހިމެނޭކަމަށް ކޮމިޝަނަށް ފާހަގަވެއްޖެނަމަ، އެފަރާތްތަކާމެދުވެސް ސިވިލް ސަރވިސްގެ ޤާނޫނާ ޤަވައިދާއި ކޯޑް އޮފް ކޮންޑަކްޓްގެ ދަށުން އެކަށީގެންވާ ފިޔަވަޅު އެޅިގެންދާނެއެވެ.

ކޮމިޝަނުގެ ނިންމުމާމެދު ހިތްހަމަނުޖެހުން

ސިވިލް ސަރވިސް ކޮމިޝަނުގެ ނިންމުމަކީ، މައްސަލަ ހުށަހެޅި މުވައްޒަފަށް ނުވަތަ މައްސަލައިގާ ހިމެނޭ މުވައްޒަފު ޤަބޫލުކުރާ ނިންމުމެއްކަމަށް ނުވާނަމަ، އެމައްސަލައެއް ވަޒީފާއާބެހޭ ޓްރައިބިއުނަލަށް ނުވަތަ މައްސަލައާއި ގުޅުންހުރި ކޯޓަކަށް ހުށަހެޅުމުގެ ޙައްޤު ސިވިލް ސަރވިސްގެ ކޮންމެ މުވައްޒަފަކަށްވެސް ލިބިގެންވެއެވެ. އެމުވައްޒަފަށް ލިބިދޭ ޙައްޤުތައް ރައްކާތެރިކުރުމަށްޓަކައި، ކޮމިޝަނުގެ ނިންމުމަކީ އެންމެ ރަނގަޅު ނިންމުންތޯ ކަށަވަރުކުރުމަށް، ޝަރުޢީ ކޯޓުތައް މެދުވެރިކޮށް އެ މައްސަލަ އިތުރަށް ބެލުމަށް ހުށަހެޅުމުގެ ޙައްޤު އެމުވައްޒަފަށް ލިބިގެންވެއެވެ.

ނިންމުން

ސިވިލް ސަރވިސްގެ ވަޒީފާއެއްގައި މަސައްކަތްކުރަމުންދާ ފަރާތަކުން މިފަދަ ޢަމަލެއް ހިންގާތަން ފެނިއްޖެނަމަ ނުވަތަ އެކަމުގެ މަޢުލޫމާތު އެނގިއްޖެނަމަ، އެ ޢަމަލެއް ސިވިލް ސަރވިސް ކޮމިޝަނަށް ހުށަހެޅުމަކީ އެ ފަރާތުގެ މަސްޢޫލިއްޔަތެކެވެ. ސިވިލް ސަރވިސް މުޢައްސަސާއެއްގައި ވަޒީފާއަދާކުރާ ފަރާތެއްގެ ޙައިސިއްޔަތުން، ތިމާއަށް ލިބިދީފައިވާ ޙައްޤުތަށް ހިމާޔަތްކޮށް ރައްކާތެރިކުރުމަށް މަގުފަހިކޮށްދީފައި ވީހިނދު، އެކަމުގެ ބޭނުން އެންމެ ފުރިހަމަ ގޮތުގައި ހިފަމާތޯއެވެ.

އަލްއުސްތާޛާ ޞަބްރިޔަތު ޙުސައިންއަކީ ނަޝީދު އެންޑް ކޯ އުތުރު ބްރާންޗުގެ ވަކީލެކެވެ. މިއީ ޢާންމު ޙޭލުންތެރިކަން އިތުރު ކުރުމުގެ މަޤްސަދުގައި، ނަޝީދު އެންޑް ކޯ އުތުރު ބްރާންޗުން އެކުލަވާލާފައިވާ ލިޔުމެކެވެ. މިއީ، ޤާނޫނީ ލަފާކަމުގައި ނުބެއްލެވުންއެދެމެވެ. ދިމާވާވަކި ޤާނޫނީ މައްސަލަތަކުގައި އެންމެ ރަނގަޅު ގޮތަކަށްވާނީ، އެކަމަކަށް ވަކިން ޤާނޫނީލަފާ ހޯއްދެވުމެވެ.