ކުމުންދޫގައި ޕާކެއް، ކުދިންތައް އުފަލުން

ހދ. ކުމުންދޫގައި ފުރަތަމަ ފަހަރަށް ކުޑަކުދިންގެ ޕާކެއް ހަދައި ހުޅުވައިފި އެވެ. އެރަށުގެ ސްޓޭޖް ހުންނަ ސަރަހައްދުގައި ހުޅުވި މި ޕާރކް އާންމުކޮށް ހުޅުވާލީ މިދިޔަ ބޮޑުއީދު ފުރަތަމަ ދުވަހު އެވެ. އެ ސަރަހައްދަށް ކައުންސިލުން "ސީދީބެ މައިޒާން" ނަމުން ވަނީ ނަންދީފައި އެވެ.

ކުމުންދޫ ކައުންސިލްގެ ރައީސް އަމީން މުހައްމަދު ކޭއޯއަށް މައުލޫމާތު ދެމުން ވިދާޅުވީ މި ފަދަ މައިޒާނެއް ހުޅުވުމުގެ ބޭނުމަކީ ކުޑަކުދިންނަކީ މުޖުތަމައުގައި މުހިއްމު ބަޔަކަށް ވާއިރު އެކުދިން ހެލިފެލިވެ އުޅޭނެ ތަނެއް ގާއިމްކޮށްދިނުން ކަމަށެވެ.

ސީދީބެގެ ނަން މައިޒާނަށް ދީފައިވަނީ އެރަށުގެ ތައުލީމަށް ގިނަ ހިދުމަތް ކޮށްދެއްވި އައްބާސް އަލީ (ސީދިބެ) ގެ ހަނދާނުގައިއެވެ. މައިޒާން ހުވާލުމާއެކު ކޮންމެ ދުވަހަކުވެސް ގިނަ އަދަދެއްގެ ކުޑަކުދިން އަންނަނީ އެތަނަށް ޒިޔާރާތްކުރަމުންނެވެ.

ކުމުންދޫ ކައުންސިލާއި އަދި ހޯމް މިނިސްޓްރީގެ ބޮޑު އެހީއަކާއެކު މި ހުޅުވި މައިޒާނަށް ބޭނުންވާ ސާމާނު ގަނެފައިވަނީ ކައުންސިލްގެ ހަރަދުގައި އެވެ. އެ ތަކެތި ފޯރު ކޮށްދީފައިވަނީ ބެސްޓް ބަޑީންނެވެ. އެސަރަހައްދުގައި ހިމެނޭ ސްޓޭޖަކީ ކައުންސިލްގެ އަމިއްލަ ހަރަދުން އިމާރަތް ކޮށްފައިވާ ތަނެއްކަމަށް އަމީން ވިދާޅުވި އެވެ.

އަމީން ވިދާޅުވީ މި މައިޒާން ހެދުމަށް ރަށުގެ ރައްޔިތުންގެ އެއްބާރުލުން ވަރަށް ބޮޑަށް ލިބިފައިވާ ކަމަށާއި އެގޮތުން މައިޒާންގައި ހިމެނޭ ކުޑަކުދިންގެ ޕާކު އިމާރަތް ކުރުމަށް ހަވާލު ކުރި ޖޭޖޭ ޑިވެލޮޕިން ޕްރައިވެޓް ލިމިޓެޑްގެ އެހީތެރިކަން އަމީން ފާހަގަ ކުރެއްވި އެވެ. އަދި މީގެ އިތުރުން ހޯމް މިނިސްޓްރީއާއި ބެސްޓް ބަޑީގެ ނަންވެސް ފާހަގަ ކުރެއްވި އެެވެ.