"ލިޓްލް ބަޑީ ޓެލެންޓްޒް" މުބާރާތެއް ރާއްޖޭގައި ބާއްވަނީ

ކުޑަކުދިންނަށް ހާއްސަކޮށް ދުނިޔޭގައި ބާއްވާ އެންމެ ބޮޑު އޮންލައިން ޓެލެންޓް ޕްލެޓްފޯމް "ލިޓްލް ބަޑީ ޓެލެންޓްޒް"އިން ރާއްޖޭގައި އޮންލައިން ޓެލެންޓް މުބާރާތެއް ފަށައިފި އެވެ.

މުބާރާތުގެ ބައިވެރިންނަށް މައިގަނޑު ހަތަރު ހަރަކާތަކުން ހުނަރު ދައްކާލެވޭނެ އެވެ. އެއީ ކުރެހުން، ލަވަކިޔުން، ނެށުން އަދި އިންސްޓްރުމެންޓަލް މިއުޒިކް އެވެ. ބައިވެރިން ބަހާލާނީ ހަތަރު އުމުރުފުރާއެއްގެ ކެޓަގަރީއަކަށެވެ.

އެގޮތުން މުބާރާތުގައި ބައިވެރިވުމުގެ ފުރުސަތު 2.5 އަހަރާއި 18 އަހަރާ ދެމެދުގެ ހުރިހާ ކުދިންނަށް ވެސް ވަނީ ހުޅުވާލާފަ އެވެ.

އެގޮތުން ކެޓަގަރީ އޭގައި ހިމެނޭނީ 2.5 އަހަރާއި 5 އަހަރާ ދެމެދު ކުދިންނެވެ. ކެޓަގަރީ ބީގައި 6 އަހަރާއި 10 އަހަރު ކުދިން އަދި ސީގައި ހިމެނެނީ 11 އަހަރާއި 13 އަހަރު ކުދިންނެވެ. ކެޓަގަރީ ޑީގައި ހިމެެނެނީ 14 އަހަރުން ފެށިގެން 18 އަހަރުގެ ކުދިންނެވެ.

މި މުބާރާތުގެ ޖަޖުންގެ ޕެނަލްގައި ހިމެނެނީ ރާއްޖޭގެ މަޝްހޫރު ލަވަކިޔުންތެރިޔާ މަރިޔަމް އުނޫޝާ، ކުރިހެމުގެ ދާއިރާއިން ފާހަގަކޮށްލެވޭ ސުމްޔާ ސުދީޝްގެ އިތުރުން ނެށުންތެރިޔާ ރޮބޯމޭން އެވެ.

ރާއްޖޭގައި ބާއްވާ މި މުބާރާތުގެ ޑިޖިޓަލް ޕާޓްނަރަކީ އުރީދޫ މޯލްޑިވްސް އެވެ.

މި މުބަރާތް ރާއްޖޭގެ އިތުރުން ޔޫރަޕް، އެފްރިކާ އަދި ދުނިޔޭގެ އެހެން ސަރަހައްދުތަކުގެ ގައުމުތަކުގައި ވެސް ބޭއްވުމަށް ވަނީ ނިންމާފަ އެވެ. އަދި ކޮންމެ ގައުމަކުން ވެސް ގަދަ 16އަށް ހޮވޭ ބައިވެރިން ވާދަކޮށްގެން ދުނިޔޭގެ ގަދަ ހަތަރެއް ހޮވާ މުބާރާތެއް ވެސް އޮންނާނެ އެވެ.