ޕޮލިސް ކޭސްއާ ގުޅުން ހުރި ދެ މީހަކު ޕޮޒިޓިވްވެެއްޖެ

ކުޅުދުއްފުށީ ޕޮލިސް ސްޓޭޝަންގައި މަސައްކަތް ފުލުހަކު ކޮވިޑް-19 އަށް ޕޮޒިޓިވްވުމާ ގުޅިގެން މިއަދު ކުރިއަށްގެންދިޔަ ކޮންޓެކްޓް ރޭސިންގެ ތެރެއިން ހދ އަތޮޅުން ނެގި 23 ސާމްޕަލްގެ ތެރެއިން ދެ ސާމްޕަލް ޕޮޒިޓިވްވެއްޖެ އެވެ.

ކޭއޯއަށް އެނގިފައިވާގޮތުގައި ޕޮޒިޓިވްވެފައިވަނީ ޑައިރެކްޓް ކޮންޓެކްޓްގެ ގޮތުގައި ފާހަގަކުރެވުނު ދެ ފުލުހެކެވެ. ކޮންޓެކްޓް ޓްރޭސިންގެ ތެރެއިން އެ މީހުން ތިބީ އެކަހެރިކޮށްފަ އެވެ. މިއަދު ކުރިއަށްގެންދިޔަ ކޮންޓެކްޓް ޓްރޭސިންގައި ހދ އަތޮޅުން 23 މީހެއްގެ ސާމްޕަލެއް ނަގާފައިވެ އެވެ. އެއީ ކުޅުދުއްފުށިން ނެގި 10 ސާމްޕަލަކާއި ކުރިނބީ ނެގި 13 ސާމްޕަލެކެވެ.

މިއަދު ނެގި 23 ސާމްޕަލްގެ ނަތީޖާ ލިބިފައިވާއިރު ޕޮޒިޓިވްވެފައިވަނީ ދެ ސާމްޕަލްކަމަށް އޮފިޝަލަކު ވިދާޅުވި އެވެ. ފުލުސް އޮފިސަރުގެ ކޭސްއާ ގުޅިގެން ތިލަދުންމަތީގެ 10 ރަށެއްގައި 150 މީހުން ވަނީ އެކަހެރިކޮށްފަ އެވެ. އޭގެ ތެރޭގައި ހިމެނެނީ 84 ފުލުހަކާއި އާންމުގެ ތެރެއިން 66 މީހެކެވެ.

ހއ އަތޮޅާއި ށ އަތޮޅުން ކަރަންޓީނުކުރި މީހުންގެ ސާމްޕަލް ނެގުމުގެ މަސައްކަތް ކުރިއަށްދާއިރު އެ ސާމްޕަލްތައް ޓެސްޓްކުރުމުގެ މަސައްކަތް މާދަމާ ކުރާނެކަމަށް މައުލޫމާތުލިބެ އެވެ.