ވަޅި ޖެހި މައްސަލާގައި ހައްޔަރުކުރި މީހާގެ ބަންދަށް 10 ދުވަސް ޖަހައިފި

ކުޅުދުއްފުށި ސިޓީގައި ޒުވާނެއް ގަޔަށް ވަޅި ޖަހައި ޒަހަމްކޮށްލި މައްސަލާގައި ހައްޔަރުކުރި މީހާގެ ބަންދަށް ދިހަ ދުވަސް ޖަހައިފި އެވެ.

މިދިޔަ ބުދަ ދުވަހު ފިހާރައެއްގެ ތެރޭގައި ހިނގި މި ހާދިސާގައި ހައްޔަރުކޮށްފައިވަނީ ސަވާނާ/ އަލީ ސާޖިދު އިބުރާހިމް (28އ) އެވެ.

ބުރާސްފަތި ދުވަހު އޭނާގެ ބަންދާމެދު ގޮތެއް ނިންމުމަށް ކުޅުދުއްފުށީ މެޖިސްޓްރޭޓް ކޯޓަށް ހާޒިރުކުރުމުން އެ ކޯޓުން ވަނީ އޭނާ ބަންދުގައި ބަހައްޓަން 10 ދުވަސް ޖަހައިދީފަ އެވެ.

ބަރާބަރު ފިހާރާގައި ބުދަ ދުވަހުގެ މެންދުރު 11:30 ހާއިރު ހިންގި މިހާދިސާގައި ޒަހަމްވެފައިވަނީ އުމުރުން 22 އަހަރުގެ ޒުވާނެކެވެ. ވަޅީގެ ހަމަލާ އަމާޒުވެފައިވަނީ އޭނާގެ ކަނާތު ކަންފަތް މައްޗަށެވެ.

ކޭއާރުއެޗުގައި ފަރުވާދިނުމަށްފަހު އޭނާ މިހާރު ވަނީ ގެޔަށް ދޫކޮށްލާފަ އެވެ. ވަޅި ޖަހަން ދިމާވި ސަބަބު މިހާތަނަށް ފުލުހުން ހާމަކޮށްފައެއް ނުވެ އެވެ.