އަންނަ އަހަރު ތައުލީމީ ދާއިރާއަށް 4 ބިލިއަން ރުފިޔާ

އަންނަ އަހަރަށް ލަފާކުރާ ބަޖެޓުގައި ތައުލީމީ ދާއިރާއަށް 4 ބިލިއަން ރުފިޔާ ހިމަނައިފި އެވެ.

މިއަދުގެ މަޖިލީހުގައި އަންނަ އަހަރަށް ލަފާ ކުރާ ބަޖެޓު ހުށައަޅުއްވާދެއްވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ މި ބަޖެޓަކީ އިޤްތިސާދީ ހަރަކާތްތައް ފުޅާވަމުންދާ ދަނޑިވަޅެއްގައި ބޭނުންވާ ވޯރކްފޯސް ބިނާކުރުމަށާއި، ތައުލީމަށްޓަކައި ހިޖުރަކުރަން ޖެހޭ މިންވަރު ކުޑަކުރުމަށް އިސްކަންދީގެން ކަނޑައެޅިފައިވާ ބަޖެޓެއް ކަމަށެވެ.

އަމީރު ވިދާޅުވީ ބަޖެޓުތެރޭގައި ސްކޫލު ތަކާއި، ކްލާސްރޫމްތަކާއި، ތައުލީމީ ވަސީލަތްތައް ބިނާ ކުރުމަށް ހަރަދު ކުރެވޭނެ ކަމަށާއި ތައުލީމީ ދާއިރާއަށް ކުރެވޭ ހޭދައިން ދަރިވަރުންނަށް ދެވޭ ތައުލީމުގެ ފެންވަރު މަތިކުރުމަކީ މިސަރުކާރުގެ އަމާޒެއް ކަމަށެވެ.

މީގެ އިތުރުން ސަރަހައްދީ ތަރައްޤީގެ ތަސައްވުރުގެ ތެރެއިން، ހާއްސަ އިސްކަމެއްދީގެން ރާއްޖޭގެ 5 ސަރަހައްދެއްގައި ފެންވަރު ރަނގަޅު، ވަށާޖެހޭ ތައުލީމީ ނިޒާމަކަށް ވާސިލްވުމަށް ބޭނުންވާ ވަސީލަތްތައް ގާއިމްކުރުމަށް މި ބަޖެޓުގައި ވަނީ ހިމެނިފަ ކަމަށް އަމީރު ވިދާޅުވި އެވެ.

ހެނދުނުގެ ނާސްތާ ޕްރޮގްރާމް، ބަދަލުތަކަކާއެކު އިތުރަށް ހަރުދަނާކޮށް އެފިޝަންޓްކޮށް އަންނަ އަހަރުވެސް މި ޕްރޮގްރާމް ކުރިއަށް ގެންދިއުމަށް ބަޖެޓުކުރެވިފައިވާކަމަށް މިނިސްޓަރ ވިދާޅުވި އެވެ.