ސިއްހީ ކުއްލި ނުރައްކަލުގެ ހާލަތު ޖެނުއަރީ ހަތަރަކަށް އިތުރުކޮށްފި

ކޮވިޑާ ގުޅިގެން އިއުލާނުކޮށްފައިވާ ސިއްހީ ކުއްލި ނުރައްކަލުގެ ހާލަތު އަންނަ މަހު 4 ހަމައަށް އަނެއްކާވެސް އިތުރުކޮށްފި އެވެ.

އެންމެ ފަހުން އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތު ރެއަށް ހަމަވެފައިވާއިރު ހެލްތު މިނިސްޓްރީން ރޭ ނެރުނު އިއުލާނުގައި ބުނެފައިވަނީ އްޖޭގެ ހުރިހާ ސަރަހައްދެއްގައި 12 މާޗު 2020 އިން ފެށިގެން އިއުލާނުކޮށްފައިވާ އާންމު ސިއްހަތުގެ ކުުއްލި ނުރައްކަލުގެ ހާލަތު އަންނަ މަހު ފަހެއްގެ ނިޔަލަށް ދަމަހައްޓަން ނިންމާފައިވާކަމަށެވެ.

ކޮވިޑް-19 އާއި ގުޅިގެން ސިއްހީ ކުއްލި ނުރައްކަލުގެ ހާލަތު އިއުލާން ކުރީ އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުންނެވެ. އެ ހާލަތު އިއުލާންކޮށްފައިވާ މުއްދަތުގައި ރައްޔިތުންގެ ސަލާމަތާއި ރައްކާތެރިކަމަށްޓަކައި ޑިރެކްޓާ ޖެނެރްއަލް އޮފް ޕަބްލިކް ހެލްތަށް ބޮޑެތި ބާރުތަކެއް ލިބިގެންވެއެވެ. އެ ބާރުގެ ދަށުން ބޮޑެތި ފިޔަވަޅުތަކެއް އަންނަނީ އަޅަމުންނެވެ.

އެގޮތުން އާންމު ރައްޔިތުންގެ ސިއްހަތާއި ރައްކާތެރިކަން ކަށަވަރުކުރުމަށް ހާއްސަ ފިޔަވަޅުތަކެއް އަޅަންޖެހޭ ކަމަށް ޑިރެކްޓާ ޖެނެރަލް އޮފް ޕަބްލިކް ހެލްތަށް ގަބޫލުކުރެވޭ ކަމަށް މިނިސްޓަރަށް ލަފާދެއްވާފައިވާ ކަމަށް ގަރާރުގައި ވިދާޅުވެފައި ވެއެވެ.