ކުޅުދުއްފުށީގައި ދިރިއުޅޭ ބޮޑެތި ބަލިތަކަށް ފަރުވާ ކުރާ ފަރާތްތަކުގެ މައުލޫމާތު ހޯދަނީ

ކުޅުދުއްފުށީ ސިޓީގައި ދިރިއުޅޭ އުމުރުން 50 އަހަރުން މަތީގެ މީހުންގެ ތެރެއިން ދާއިމީ ބޮޑެތި ބަލިތަކަށް ފަރުވާކުރާ ފަރާތްތަކުގެ މައުލޫމާތު ހޯދައި ރަޖިސްޓްރީ ކުރުމަށް ކުޅުދުއްފުށީ ރީޖަނަލް ހޮސްޕިޓަލުން ބޭނުންވާކަމަށް އެ ހޮސްޕިޓަލުން ބުނެފި އެވެ.

އެ ހޮސްޕިޓަލުން ކުރި އިއުލާނެއްގައި ބުނެފައިވަނީ ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އެންގުމުގެ މަތިން އުމުރުން ދުވަސްވީ މީހުންނާއި ދިގު މުއްދަތަށް ބޭސްފަރުވާ ކުރަމުންދާ މީހުންގެ ރަޖިސްޓްރީއެއް ދެމެހެއްޓުމަށްޓަކައި ރާއްޖޭގައި 50 އަހަރުން މަތީގެ އަބާދީއާއި ކޯމޯބިޑް ފަރާތްތައް ދެނެގަނެ ރަޖިސްޓްރީއެއް އެކުލަވާލުމުގެ މަސަކަތް ކުރަމުންދާ ކަމަށެވެ.

އެހެން ކަމުން ކުޅުދުއްފުށީގެ ރަޖިސްޓްރީގައިވާ މީހުންނާއި ރަށުން ބޭރުން މި ރަށަށް ދިރިއުޅުން ބަދަލުކޮށްފައިވާ ފަރާތްތަކުގެ ތެރެއިން 50 އަހަރުން މަތީގެ މީހުންނާއި ދާއިމީ ބޮޑެތި ބަލިތަކަށް ފަރުވާ ކުރި ނުވަތަ ކުރަމުންދާ ހުރިހާ ފަރާތަކުން އެ މައުލޫމާތު އެ ހޮސްޕިޓަލަށް ހިއްސާ ކުރުމަށް އެދެ އެވެ.

މި މައުލޫމާތު ހިއްސާކުރުމަށް މި މަހުގެ 10 ވަނަ ދުވަހުގެ 18:00 ގެ ކުރިން 6521525 އަދި 6521524 އަށް ކޮންމެ ދުވަހެއްގެ 08:00 ން 18:00 އަށް ގުޅުމަށް ހޮސްޕިޓަލުން އެދެ އެވެ.