އަހަރުގެ ފުރަތަމަ 3 ދުވަހު 10،000 ވުރެ ގިނަ ފަތުރުވެރިން

މި އަހަރުގެ ފުރަތަމަ 3 ދުވަސްތެރޭގައި 10،360 ފަތުރުވެރިން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީ އިން ބުނެފި އެވެ.

އެ މިނިސްޓްރީ އިން އާންމުކުރި ތަފާސް ހިސާބަށް ބަލާއިރު، މި ޖެނުއަރީ މަހުގެ ފުރަތަމަ ދުވަހު 2,005 ޓޫރިސްޓުން، ދެވަނަ ދުވަހު 4,160 ޓޫރިސްޓުން އަދި އިއްޔެ 4,195 ޓޫރިސްޓުން އައިސްފައި ވެއެވެ.

މިއަހަރު އެންމެ ގިނައިން ފަތުރުވެރިން އައިސްފައިވަނީ ރަޝިޔާ، ޔޫކްރެއިން، އަދި އިންޑިޔާއިންނެވެ. އެގޮތުން ރަޝިޔާއިން 3،226 ފަތުރުވެރިން، ޔޫކްރެއިނުން 979 ފަތުރުވެރިން އަދި އިންޑިޔާއިން 778 ފަތުރުވެރިން އައިސްފައިވެއެވެ.

މީގެ އިތުރުން ކަޒަކިސްތާނުން 613 ފަތުރުވެރިން އައިސްފައިވާއިރު ޔޫކޭއިން 554 ފަތުރުވެރިން ރާއްޖެ އައިސްފައި ވެއެވެ.

ސަރުކާރުން އަމާޒު ހިފާފައިވަނީ މި އަހަރު 1.5 މިލިއަން ޓޫރިސްޓުން ގެނައުމަށެވެ.

މިވަގުތު 541 ޓޫރިސްޓު ފެސިލިޓީ އޮޕަރޭޝަނުގައި އޮތްއިރު އޭގެ ތެރޭގައި ހިމެނެނީ 141 ރިސޯޓު/މެރީނާ އާއި 11 ހޮޓެލްސް، 130 ސަފާރީ އަދި 259 ގެސްޓުހައުސް އެވެ. މިއީ ޖުމްލަ 41،660 ޓޫރިސްޓު އެނދެވެ.