އުރީދޫ އާއި ދިރާގުން ސްކޫލުތަކަށް އަނެއްކާވެސް ޑޭޓާ އެލަވެންސް ދެނީ

މި އަހަރުގެ ފުރަތަމަ ތިން މަހަށް އުރީދޫ އާއި ދިރާގުން ރާއްޖޭގެ ސްކޫލުތަކަށް ޑޭޓާ އެލަވަންސް ދޭން ނިންމައިފި އެވެ.

އަންނަ ހަފްތާގައި ސްކޫލުތަކުގެ ދެވަނަ ޓާމް ކިޔެވުން ފެށޭ އިރު ޓީޗަރުންއި ދަރިވަރުންނަށް ޑޭޓާ އެލަވަންސް ދޭން އުރީދޫ އާއި ދިރާގުން ވެސް ވަނީ އެއްބަސްވެފަ އެވެ. ޑޭޓާ އެލަވަންސް ލިބޭ މީހުންގެ އަދަދު ގާތްގަނޑަކަށް 25،000 އަށް އަރާނެ ކަމަށްވެ އެވެ.

އެގޮތުން ޓީޗަރުންނަށް ދެނީ 10 ޖީބީގެ ޑޭޓާ އެލަވަންސް އެވެ. ދަރިވަރުންނަށް 5 ޖީބީގެ ޑޭޓާ އެލަވަންސް ލިބޭނެ އެވެ.

އަލުން ހިލޭ ޑޭޓާ އެލަވަންސް ދޭން ރާއްޖޭގެ މުވާސާލާތީ މައި ދެ ކުންފުނިން ނިންމީ ކޮވިޑްގެ ހާލަތު މުޅިން ރަނގަޅު ނުވާތީ ސްކޫލުތަކުން އޮންލައިން ކޮށް ބައެއް ކްލާސްތައް ގެންދަން ޖެހޭނެތީ އެވެ.

ސްކޫލުތަކަށް ޑޭޓާ ދޭން ފަށާފައިވެސް ވަނީ މިދިޔަ އަހަރު ކުރިމަތިވި ކޮވިޑްގެ ހާލަތާ ގުޅިގެން ގޭގައި ތިބެގެން އޮންލައިން ކްލާސްތައް ހިންގަން ފެށުމުންނެވެ.