އޭލެވެލް އާއި އޯލެވެލް އިމްތިހާން މެއި/ޖޫންގައި

މިއަަހަރު މޭ/ޖޫންގައި ބާއްވަން ތާވަލްކޮށްފައިވާ އޯ ލެވެލް އަދި އޭ ލެވެލް އިމްތިހާން ކުރިއެކޭ އެއްގޮތަށްވެސް ބާއްވަން ނިންމާފައިވާކަމަށް އެޑިއުކޭޝަން މިނިސްޓްރީން ބުނެފި އެވެ.

މިނިސްޓްރީން ކުރި ޓްވީޓެއްގައި ބުނެފައި ވަނީ ކެމްބްރިޖް އާއި އެޑެކްސެލް އިމްތިހާނު އަންނަ މެއި/ ޖޫން މަހު ކުރިއަށް ދާނެ ކަމަށެވެ.

ރާއްޖޭގައި އޯލެވެލް އިމްތިހާނު ކެމްބްރިޖް އިން ކުރިއަށް ގެންދާ އިރު އޭލެވެލް އިމްތިހާނުތައް ބާއްވަނީ އެޑެކްސެލް އިން އެވެ.

2021 ވަނަ އަހަރު މެއި/ޖޫން ގައި ބޭއްވުމަށް ހަމަޖެހިފައިވާ ކެމްބްރިޖް އަދި އެޑެކްސެލް ގެ އިމްތިހާނުތައް ތާވަލުކޮށްފައިވާ ގޮތަށް ދިވެހިރާއްޖޭގައި ކުރިޔަށް ދާނެ ވާހަކަ މަޢުލޫމާތައްޓަކައި ދެންނެވީމެވެ.

— Ministry of Education (@MoEdumv) January 6, 2021

ކޮވިޑާ ގުޅިގެން މިދިޔަ އަހަރު މޭ/ޖޫން ގައި ބާއްވަން ނިންމި އެޑެކްސަލް އިމްތިހާންވެސް ނުބާއްވައެވެ. އަދި މިދިޔަ އަހަރު އޯ ލެވެލް އިމްތިހާންވެސް މިއަަހަރަށް ފަސްކުރިއެވެ.

ސްކޫލްތަކަށް މިދިޔަ އަހަރު އެޑިއުކޭޝަން މިނިސްޓްރީން ފޮނުވާފައިވާ ސާކިއުލާއެއްގައި ބުނެފައި ވަނީ އިމްތިހާން ފަސްކުރަން ނިންމީ ސިލަބަސް ފުރިހަމަކުރާށާއި އިމްތިހާނަށް ތައްޔާރުވާން އެކަށީގެންވާ ވަގުތު ދަރިވަރުންނަށް ނުލިބޭތީ ކަމަށެވެ.

މޭ/ޖޫން އިމްތިހާން ކުރިއަށް ގެންދަން ނިންމިއިރު، އަންނަ އާދިއްތަ ދުވަހު ރާއްޖޭގެ ހުރިހާ ސްކޫލްތަކެއްގައި ހުރިހާ ގްރޭޑެއްގެ ކުދިން އަންނަ ޓާމްގެ ކިޔެވުން ފަށަން މިހާރު ވަނީ ނިންމައިފައެވެ.