އިންޑިއާގެ ހޮސްޕިޓަލެއްގައި ހިނގި އަލިފާނުގެ ހާދިސާގައި ތުއްތު ކުދިންތަކެއް މަރުވެއްޖެ

އިންޑިއާގެ ހޮސްޕިޓަލެއްގައި އަލިފާނުގެ ހާދިސާއެއް ހިނގައި 10 ތުއްތު ކުދިން މަރުވެއްޖެ އެވެ. މި ހާދިސާގައި އެ ހޮސްޕިޓަލުގެ ސްޓާފުންވަނީ 7 ތުއްތުކުދިން ސަލާމަތް ކޮށްފަ އެވެ.

ބަންޑާރަ ޑިސްޓްރިކްޓް ހޮސްޕިޓަލުގައި މިއަދު ހެނދުނުގެ ވަގުތެއްގައި ހިނގި އަލިފާނުގެ ހާދިސާގައި އެއްވޯޑުގައި ތިބި 07 ކުދިން ސަލާމަތް ކުރެވުން އިރު ހަމަ އެ ވޯޑުގައި ތިބި 10 ކުދިން ސަލާމަތް ނުކުރެވުނު ކަމަށް ހޮސްޕިޓަލުގެ އޮފިސަލަކު ވަނީ އިންޑިއާގެ މީޑިއާތަކަށް މައުލޫމާތު ދީފަ އެވެ.

އޮފިސަލު ވިދާޅުވީ މި ހާދިސާ ހިނގަން މެދުވެރިވި ސަބަބެއް އަދި ނޭނގޭ ކަމަށާއި އަލިފާން ރޯވުމާއިއެކު ހުރިހާ ސްޓާފުން ވީ އެންމެ އަވަހަކަށް އަލިފާންގަނޑު ނިއްވާލުމުގައި ހަރަކާތްތެރިވެ، އަލިފާންގަނޑު ނިއްވާލައިފައިވާ ކަމަށެވެ.

މި ކުދިން މަރުވެފައިވަނީ ދުމުގެ ސަބަބުން ނޭވާ ހާސްވެގެން ކަމަށާއި އެންމެ ފުރަތަމަ އަލިފާން ރޯވެފައިވާކަމަށް ރިޕޯޓު ކުރީ ދުމުގެ އަސަރު ފެނުމާއިއެކު އެ ހޮސްޕިޓަލުގެ ނަރުހުންތަކެއް ކަމަށެވެ.

މި ހާދިސާއާއި ގުޅިގެން އިންޑިއާގެ ޕްރައިމް މިނިސްޓަރ ނަރެންދްރަ މޯދީ ޓްވީޓް ކުރައްވާ ވިދާޅުވީ މިއީ ހިތްދަތި އަދި ހިތާމަވެރި ހާދިސާއެއް ކަމަށެވެ.