އިންތިހާބުގައި ވާދަކުރާ ސިވިލް ސާވަންޓުން 29 ވަނަ ދުވަހުން ފެށިގެން ސަސްޕެންޑްވާނެ

އޭޕްރިލް 10 ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލް އިންތިހާބުގައި ވާދަކުރާ ސިވިލް ސާވަންޓުން އެމީހުންގެ މަގާމުތަކުން މިމަހު 29 ފެށިގެން ސަސްޕެންޑް ވާނެކަމަށް އިލެކްޝަން ކޮމިޝަން (އީސީ) އިން ބުނެފި އެވެ.

މިިދިޔަ އަހަރު ބޭއްވުމަށް ނިންމި ކައުންސިލް އިންތިހާބު ކޮވިޑް-19 އާއި ގުޅިގެން ލަސްކުރުމުން އެއިރު އިންތިހާބަށް ކުރިމަތިލި ސިވިލް ސާވެންޓުންގެ ވަޒީފާވަނީ ލޯކަލް ކައުންސިލް އިންތިހާބާ ބެހޭ ގާނޫނުގައި މާއްދާއެއް އެކުލަވާލާ އެމީހުންގެ ސަސްޕެންޝަން އުވާލާފައެވެ.

ގާނޫނުގައިވާ ގޮތުން، ސިވިލް ސާވިސްގެ ވަޒީފާއެއްގައި ހުރި މީހަކު އިންތިޚާބަކަށް ކުރިމަތިލައިފި ނަމަ އެ މީހަކު ހުރި މަގާމުން ސަސްޕެންޑު ވާނެ އެވެ. އެހެންކަމުން މިދިޔަ އަހަރު އެ އިންތިހާބަށް ކުރިމަތިލުމަށް ފޯމު ހުށަހެޅި 204 ސިވިލް ސާވަންޓަކު މަގާމުތަކުން އޭރު ސަސްޕެންޑުވި އެވެ.

އީސީން މިއަދު ބޭއްވި ނޫސްވެރިންގެ ބައްދަލުވުމުގައި، އެ ކޮމިޝަނުގެ އާ ނައިބު ރައީސް އިސްމާއިލް ހަބީބު ވިދާޅުވީ، އިންތިޚާބުގައި ވާދަކުރާ ސިވިލް ސާވަންޓުން އަނެއްކާވެސް މި މަހުގެ 29 އިން ފެށިގެން މަގާމުތަކުން ސަސްޕެންޑު ވާނެ ކަމަށެވެ.