މިދިޔަ އަހަރު ސާފު ފައިދާގެ ގޮތުގައި އުރީދޫއަށް 407.4 މިލިއަން ރުފިޔާ

އުރީދޫއަށް މިދިޔަ އަހަރު ސާފު ފައިދާގެ ގޮތުގައި 407.4 މިލިއަން ރުފިޔާ ލިބިއްޖެ އެވެ.

އުރީދޫން އާއްމުކޮށްފައިވާ ރިޕޯޓުތައް ދައްކާ ގޮތުގައި މިދިޔަ އަހަރު އެ ކުންފުނީގެ އާމްދަނީ ވަނީ އޭގެ ކުރީ އަހަރާ އަޅާބަލާއިރު ދަށްވެފަ އެވެ. ސާފު ފައިދާ އަށް 2019 ވަނަ އަހަރު އެ ކުންފުންޏަށް 588.6 މިލިއަން ރުފިޔާ ލިބުނެވެ. މިއީ އޭގެ ކުރީ އަހަރާ އަޅާބަލާއިރު 181.2 މިލިއަން ރުފިޔާ ދަށްވުމެކެވެ.

އެގޮތުން، 2019 ވަނަ އަަހަރު ދެ ބިލިއަން ރުފިޔާގެ އާމްދަނީ ލިބުނުއިރު މިދިޔަ އަހަރު ލިބުނީ 1.7 ބިލިއަން ރުފިޔާ އެވެ.

ރިޕޯޓުތައް ދައްކާ ގޮތުގައި އުރީދޫގެ ހިންގުމުގެ ހަރަދު މިދިޔަ އަހަރު ވަނީ އޭގެ ކުރީ އަހަރާ އަޅާ ބަލާއިރު އެއްވަރެއްގައި ހިފަހައްޓައިފަ އެވެ. 2019ވަނަ އަހަރު އެއް ބިލިއަން ރުފިޔާ ހޭދަ ކޮށްފައިވާއިރު މިދިޔަ އަހަރު ހޭދަ ކޮށްފައިވަނީ 928 މިލިއަން ރުފިޔާ އެވެ.

އުރީދޫން ބުނި ގޮތުގައި މިދިޔަ އަހަރު އެ ކުންފުނީގެ އާމްދަނީއަށް އަސަރުކޮށްފައިވަނީ ކޮވިޑް-19ގެ ސަބަބުން ރާއްޖެއަށް އަންނަ ޓޫރިސްޓުންގެ އަދަދު ދަށްވުމުންނެވެ. މީގެ ސަބަބުން އެ ކުންފުންޏަށް ރޯމިން އިން ލިބޭ އާމްދަނީ ވަރަށް ބޮޑަށް ދަށްވި ކަމަށް އުރީދޫން ބުންޏެވެ.