ކުޅުދުއްފުށީގައި އުޅޭ 70 އަހަރުން މަތީގެ ފަރާތްތަކަށް ކޮވިޑް-19 ވެކްސިން ޖަހަން ފަށައިފި

ކުޅުދުއްފުށި ސިޓީގައި އުޅޭ 70 އަހަރުން މަތީގެ ފަރާތްތަކަށް ކޮވިށް-19 ވެކްސިން ޖަހަން ހުޅުވާލައިފި އެވެ. އެގޮތުން މިއަދު ހަވީރު ހަތަރަކުން ހަޔަކަށް، 70 އަހަރުން މަތީގެ ފަރާތްތަކަށް ވެކްސިން ޖެހުމަށް ވަނީ ފަށާފަ އެވެ.

ކޭއާރުއެޗުން އާންމުކޮށްފައިވާ ލިޔުމެއްގެ ބުނެފައިވަނީ ވެކްސިން ޖަހަން ބޭނުންވާ އުމުރުން 70 އަހަރުން މަތީގެ ފަރާތްތަކަށް ވެކްސިން ޖެހުން ހުކުރު ދުވަހާއި ހޮނިހިރު ދުވަހުގެ ހަވީރު 16:00-18:00 އަށް އުފަން ހިޔާގައި ކުރިއަށްދާނެ ކަމަށެވެ.

ވެކްސިން ޖަހަން ބޭނުންވާ ފަރާތްތަކުން އައިޑީކާޑްގެ އިތުރުން ދާއިމީ ބައްޔަކަށް ބޭސް ބޭނުންކުރާ ފަރާތެއްނަމަ ބޭސް ސިޓީ ގެންދިނުމަށް ހޮސްޕިޓަލުން އެދެ އެވެ.

ޕަބުލިކް ހެލްތް ޔުނިޓުން ބުނީ، ވެކްސިން ޖަހަން ބޭނުންވާ މި އުމުރުގެ ކޮންމެ ބޭފުޅަކަށް އެގަޑީގައި ވަޑައިގެން ވެކްސިން ޖެހޭނެ ކަމަށެވެ.