ރާއްޖެއަށް 28 އެއާލައިނަކުން ދަތުރުކުރޭ، އެންމެ ގިނަ ފަތުރުވެރިން ގެންނަނީ އެމިރޭޓްސްއިން

ރާއްޖެއަށް 28 އެއާލައިނަކުން ދަތުރުކުރާ ކަމަށާއި އޭގެތެރެއިން މި މަހުގެ 10 ވަނަ ދުވަހުގެ ނިޔަލަށް އެންމެ ގިނައިން ޓޫރިސްޓުން ގެނެސްދީފައި ވަނީ އެމިރޭޓްސް އިންކަމަށް ޓޫރިޒަމް މިނިސްޓްރީން އާއްމު ކުރި ތަފާސް ހިސާބުތަކުން ދައްކައިފި އެވެ.

އެމިރޭޓްސް އިން 300 ފްލައިޓް މޫވްމެންޓް ރާއްޖެއަށް އަޅާފައިވާއިރު، މިހާތަނަށް 24،974 ޓޫރިސްޓުން ގެނެސްދީފައިވެ އެވެ.

ރާއްޖޭގެ ޓޫރިޒަމް މާކެޓުތަކަށް ބަލާއިރު އެންމެ ގިނައިން މީހުން އައިސްފައި ވަނީ ރަޝިއާއިންނެވެ. އެ ގައުމުން ޓޫރިޒަމްގެ 22.2 ޕަސެންޓް ހިއްސާ ކޮށްފައިވާއިރު، ޖުމްލަ 27،041 މީހުން ވަނީ ގެނެސްދީފަ އެވެ. އަދި ދެވަނަ މާކެޓަކީ އިންޑިއާ އެވެ. އެ ގައުމުން ޓޫރިޒަމްގެ 21.6 ޕަސެންޓް ހިއްސާކޮށް، 26،292 ޓޫރިސްޓުން އައެވެ.

ރާއްޖެއަށް ދެން އެންމެ ގިނައިން މީހުން ގެނެސްދީފައި ވަނީ ގަތަރު އެއާވޭސް އިން 266 ފްލައިޓް އަޅައި 17،013 މީހުން ގެނެސްދީފައިވެ އެވެ. އަދި ތިންވަނަ އަށް އެންމެ ގިނައިން ފްލައިޓް އެޅި އިންޑިއާގެ އިންޑިގޯ އިން 228 ފްލައިޓް އަޅައި 15،542 މީހުން ވަނީ ރާއްޖެ ގެނެސްދީފަ އެވެ.