ކޭސްތައް ކޮންޓްރޯލް ނުވާނަމަ ހަރުކަށި ފިޔަވަޅުތަކެއް އަޅަން ޖެހިދާނެ: އެޗްޕީއޭ

ކޭސްތައް ކޮންޓްރޯލް ނުވާނަމަ ހަރުކަށި ނިންމުންތަކެއް ނިންމަން ވެސް ޖެހިދާނެ ކަމަށާއި މިހާރު އަޅަމުންދާ ފިޔަވަޅުތަކަކީ އިތުރު ލޮކްޑައުންއަކަށް ނުދިއުމުގެ އަޅަމުންދާ ފިޔަވަޅުތަކެއް ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ ޑިރެކްޓަރ އަހުމަދު ނާސިރު ވިދާޅުވީ ލޮކްޑައުންގެ ހިތި ތަޖުރިބާ ތަހައްމަލު ކޮށްފައިވުމާއެކު އެކަން އަލުން ތަކުރާރުވިޔަ ނުދިނުމަށްޓަކައި އެޗްޕީއޭގެ ގައިޑްލައިންތަކަށް އަމަލު ކުރުން މުހިއްމު ކަމަށެވެ.

ކޭސްތައް ކޮންޓްރޯލްނުވެ ހާލަތު އިތުރަށް ގޯސްވަމުން ދާނަމަ މިހާރު ހުރިވަރަށްވުރެ ފިޔަވަޅުތައް ހަރުކަށިކޮށް އެހެން ގޮތެއް ހޯދަން ޖެހިދާނެކަން އޭނާ ފާހަގަ ކުރެއްވިއެވެ.

މާލެ ސަރަޙައްދުން ފެންނަމުންދާ ކޭސްތައް އިތުރުވެފައިވުމާއެކު ރޭގަނޑު 11:00 އިން ފަތިހު 04:00 ގެންދަނީ ކާފިއު ހިންގަމުންނެވެ. އަދި އިރުއޮއްސި 06:00 ހެނދުނު 06:00 އަށް އެއްގަމު އުޅަނދު ދުއްވުން ވަނީ މަނާކޮށްފައެވެ.