ފޯބްސްގެ ޓްރެވަލް ގައިޑް ފޯސްޓާ އެވޯޑް ރަންގަލި ރިސޯޓަށް

ރާއްޖޭގެ ލަގްޒަރީ ރިސޯޓު ކޮންޑްރަޑް މޯލްޑިވްސްގެ ރަންގަލި އައިލެންޑަށް ފޯބްސްގެ ޓްރެވަލް ގައިޑް ފޯސްޓާ އެވޯޑް ލިބިއްޖެ އެވެ.

ފޯބްސް ޓްރެވަލް ގައިޑްގެ ސީއީއޯ ފިލިޕް ބޮޔެން ވިދާޅުވީ، ކޮވިޑްގެ ހާލަތުގައި ވެސް ރަންގަލި ރިސޯޓުން ޓޫރިސްޓުންގެ ރައްކާތެރިކަން ވަރަށް ބޮޑަށް ކަށަވަރުކޮށްފައިވާ ކަމަށެވެ.

ރަންގަލި އައިލެންޑަކީ ޑައިވަރުންނާއި ސްނޯކްލިން ހެދުމަށް ޓޫރިސްޓުންގެ މަގްބޫލުކަން ހޯދާފައިވާ ރިސޯޓެކެވެ. އެގޮތުން މަންޓާ ރޭ އާއި ވޭލް ޝާކަށް ހާއްސަ ސަރަހައްދެއް ރަންގަލި ރިސޯޓުގެ މޫދު ސަރަހައްދުގައިވެ އެވެ. މީގެ އިތުރުން އަންޑާވޯޓާ ވިލާއަކާއި އަންޑާވޯޓާ ރެސްޓޯރެންޓެއް ވެސް އެ ރިސޯޓުގައި ހުރެ އެވެ. މިއީ ދުނިޔޭގައި ވެސް ހެދި އެންމެ ފުރަތަމަ ކަނޑުއަޑީގެ ވިލާ އާއި ރެސްޓޯރެންޓެވެ.

އެ ރިސޯޓުގައި 150 ވިލާ އާއި 12 ރެސްޓޯރަންޓް، ދެ ސްޕާ ވެސް ހިމެނެ އެވެ. މިއީ އދ. ރަންގަލިފިނޮޅުގައި ހިލްޓަނުން ތަރައްގީކޮށް، ހިންގަމުން އަންނަ ރިސޯޓެކެވެ.